当砖头失紧流动性

　　最近有朋友搬屋，从离岛搬去大埔近沙田佢个仔屋企对面嘅屋苑，面积细咗，听讲话就五十平方米左右，房租二万蚊。朋友年纪有番咁上下，搬屋为咗身体有乜病痛有亲人第一时间照顾。以佢单身要俾呢份租金，月收入冇五万蚊打底都难维持佢嘅日常生活支出。如果系大学毕业冇几耐，加上老婆同佢一样学历，旧年平均都就系赚呢份人工，教书嘅可能赚多少少。

　　以六百万买我朋友租嘅呢间楼，尺价万二蚊，回报率得4%，仲低过银行按揭贷款。如果楼价唔升，买呢层楼收租仲要每月贴钱，不如去炒股票，仲多个流动性。如此推论，年轻人就算大学毕业结咗婚，都冇任何激励同迫切需要去置业。讲开又讲，对於砖头嘅迷信，系呢二十年中美从谈恋爱到结婚过程嘅结果。呢世纪初，大陆入世贸组织，香港作为中美或中西投资贸易嘅必经枢纽，啱啱吃正条水。依家中美闹离婚，破镜重圆冇乜希望，我估计就算大好友中原老细老施，佢嘅座右铭系“沧浪之水清兮，可以濯吾缨；沧浪之水浊兮，可以濯吾足”，今日咁讲明日都会随时转軚。

　　呢几年中港融合更加紧密，去珠海虽然有一水之隔，但有港珠澳大桥通咗车，香港早就无声无息地同大湾区融合。老化嘅香港人口更有倾向北上养老苗头，大湾区楼价物价远比香港为低，人工都系。目前香港人北上消费已成风气，大陆网购平台又大举进入香港零售市场，而另外一方面支持香港经济嘅金融、贸易物流以及已经在失血嘅房地产嘅繁荣景象，可能已经系夕阳无限好只是近黄昏。唔好话我对香港嘅前景持悲观态度，重要嘅系以平常心对待时代潮起潮落嘅变迁，面对现实。估计香港嘅砖头正在经历佢二十年嘅泡沫爆煲，如果系旧楼仲失紧佢嘅流动性，可能遭遇自由落体。