地產博客 > 文亮言 返回
瀏覽人次:14107    回應:1
文亮言

一生人最少要做的三件半事

 

湯文亮博士

紀惠集團行政總裁
2023年12月5日

  有即將退休的老友同我講,退休三寶,老本、老伴、老友都已經有了,而且子女孝順,死而無憾,我話唔好咁悲觀,65歲才是人生開始,我自己覺得,一生人最少要做的三件半事,如果未做或者未經歴過,都唔算有一個美好人生。

  第一件事,就是談一場轟轟烈烈戀愛,何謂轟轟烈烈,就是雙方家長積極反對,好似梁祝或者羅密歐與茱麗葉,披荊斬棘才可以結婚,或者雙方分隔兩地一段長時間,最後才可以一齊,能夠經歷形勢以及時間考驗,才可以稱得上是一場轟轟烈烈的愛,現在已經很少出現,雙方家長都唔敢反對子女婚姻,因為隨時連子女都冇埋,況且結咗婚都可以離婚,分隔兩地更加不是問題,不少人坐飛機去英國聽歌劇,去探戀人更加義不容辭,所以,現在要談一場轟轟烈烈的愛比以往更難,轟轟烈烈的愛,俱往矣。

  其次是要寫一本書,老實說,這件事不難開始,但很難完成,我有不少老友大鑼大鼓請食飯,表示將會寫一本書,內容是他們自己過去的心理歷程,就好似一本自傳,請食飯的時候,連封面設計都已經做好,光陰似箭,三五年之後,老友本書仍未寫好,各位老友亦不會提及此事,畢竟大家都明白,此是講易行難的表表者,不過大家又不用擔心,這個世界有一種職業叫做槍手,專門替人寫書寫論文,我讀大學時亦做過這種職業,否則點會有閒錢溝女,只要打算寫書的人掟十幾萬出嚟,自自然然就可以有一本書,出版社會搞得妥妥當當,作者只要簽名便可以,我提醒大家一句,千祈唔好問作者關於那本書內容,可能佢都未必知道,但無論如何,只要本書是誰的名字,也算是完成了一生其中一件最少要做的事。

  第三件事我做唔到,但是很多人可以輕鬆做到,就是跑一次馬拉松,雖然我差不多每日跑步,每兩個星期跑一次10公里,但仍然未正正式式完成過一次馬拉松,報名就報了很多次,但次次都臨時甩底,不過,我亦不會太過自責,發哥亦做唔到,今年發哥只是完成半馬,揚言明年再嚟,估計發哥明年是會跑全馬,上述三件事我只是做了一件,所以唔係咁容易。

  老友很心急,問最後半件事是什麼,我話食黃花魚,老友話這有何難,街市大把有得買,我話不是街市的黃花魚,而是新榮記重達兩公斤的黃花魚,老友話沒有難度,坐言起行,今晚就去食,順便叫多幾個未食過新榮記黃花魚的老友一齊去,幫他們完成人生最少要做的半件事。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. 長期讀者 2023-12-05 10:43:49
睇咗咁耐,完來係賣廣告😆
博士,其實想問你好耐,睇你成日話去跑步,咁你幾時會跑下啲大賽呀?10km都好丫,今年渣馬跑唔跑?