今个星期五截标嘅屯门小榄冠峰街，以及同区青山公路―大榄段住宅地，都属於「轻量级」地皮，规模系今季卖地计划最细两幅。有测量师老友觉得地皮投资额细，可吸引各路财团竞逐。当中冠峰街地皮每方尺楼面地价最高估到8,532元，比月前批出嘅两幅沙田九肚豪宅地仲要贵，而两幅屯门地估值最高就合共约2.07亿元。
刘Sir知道，今次截标两幅屯门住宅地规模系今季卖地计划最细两幅，当中冠峰街更加系「蚊型」级别，可建楼面只得约8,439方尺。老友韦坚信测量师行林晋超话，正正因为地皮规模细，所以买家种类相信较广泛，中小型财团以至私人投资者都有机会入标，竞投气氛睇怕都唔差。
冠峰街每尺估8532元
由於投资额有限，有一定机会扯高地价，佢预期地皮估值约7,200万元。屈指一算，折合楼面尺价高达约8,532元，系市场上限价，唔单止有力问鼎屯门最高尺价地皮，相比九月批出两幅位於传统豪宅区的沙田九肚地仲要高。
刘Sir话畀大家知，沙田市地段第578号及579号两幅沙田九肚豪宅地皮，喺九月份以楼面尺价6,837元及8,382元批出，如果今次冠峰街住宅地真系以上述估值成交，楼面尺价将会比起两幅沙田九肚地高出约24.9%及1.8%。
事实上，市区靓地供应买少见少，有发展潜力嘅新界地盘慢慢成为发展商新宠。最近政府批出嘅新界土地地价都几好，好似十月份售出嘅屯门湖安街限量地，成交价5.51亿元，市场当初都系估4亿元唔够；又好似啱啱上月批出嘅上水青山公路毗邻香港高尔夫球会限量地，地价28.88亿元亦高过估值上限多达三成。
大榄地皮料值1.35亿
另一幅截标嘅屯门青山公路－大榄段地皮，发展密度就相对较高，总楼面约2.87万方尺，市场估计呢幅地皮成交价介乎约0.918亿至1.35亿元不等。
刘Sir
App下载
