银行学会阻人前进

左丁山儍儍地问一位教学二十几年嘅教师V：「点解你地行家要读两三个硕士学位？有硕士未必有人工加，又唔保证可以做到GM（学位教师）嘅噃？」教师V答：「教中学有两张必需文凭：一张系学士学位，另一张系教育文凭，如果冇，你根本冇资格入行，如果有，亦未必入到行，因为人人都有吖嘛，我间学校嘅TA（教学助理）都有硕士学位呀，你话我地压力几大吖！」唔怪得，教师V一早读完本科硕士，再读一个通识硕士，先至可以保到份教职，比佢年轻嘅教师更系读完一个MA又一个MA，例如一位历史教师在大学读历史，毕业后读教育文凭，幸获教职后就读教育硕士，再读历史硕士，依家又读一个IT与教育硕士，读完冇人工加噃，只系维持自己嘅「文凭竞争力」嘅啫，读咁多个学位究竟对佢嘅学生，佢嘅教学绩效有甚么好处，还待专家研究，香港中学教师如果讲学位数目之多，相信在全世界排名榜上走唔甩前五名，星期日知道老师V已经开始放清明及复活节假期，对佢讲一声：「你真得闲？」立即俾佢闹：「你都唔知我有180份卷要改！」唉，即刻唔敢出声。当佢地得闲去旅游时，就一定碰上旺季，飞机票酒店房租急升，令老师不知廉价旅游为何物！

当今社会，样样讲文凭沙纸，系不停、不断考试嘅世界，在社会做事，考唔到一张半张文凭，就成为废人，做唔到水喉匠、电灯技工、地产代理、证券保险、银行职员，考试之多，前所未见！倒教左丁山怀念四十年前入银行，行内有十几位师傅级人马对银行内部系统及运作，了如指掌，但佢地全无文凭证书，有几位只系中三程度，由信差做起，但银行就肯俾机会佢地一路向上爬升，绝无歧视，如果当时有今天之金管局睇实，嗰班师傅级一定系做低级文职，点可以升到做VP！以考试资历扼杀中学生上升机会，系今日社会怨忿因由之一，导致到年轻人觉得升唔到大学，一世冇出息，於是俾自己太大压力去考DSE。即使读完大学，考完一个专业又一个专业试，都考到神经紧张也，何况会碰到荒谬之事？见习生Y听左丁山讲，入银行之后，专心考银行学会（HKIB）试，已考到FRM，考IB去到最后阶段，只欠一科就大功告成，点知今年银行学会宣布呢科冇得考，点解呀，只有一个人报读，开唔到班喎，冇得读亦唔准自修报名考试，於是呢科冇得考，换言之，见习生Y白白要等多一年，浪费光阴，明年又唔知有什么人为阻滞，银行学会简直唯利是图，阻人前进！