上月標售五項商場等物業嘅領展（00823），尋日中午終於截標。領展發言人同劉Sir講，依家正審視緊標書，會喺適當時候公布結果，但就冇透露接到幾份標書。舊年連環奪得6個領展招標物業嘅資深投資者林子峰就話有入標競投個別商場，而紀惠集團副主席廖偉麟及投資者蔡伯能亦表態有入標，3個投資者均對可拆售車位的物業較有興趣，另市傳小巴大王馬亞木及磁帶大王陳秉志亦有入標。
兩年內三度招標物業嘅領展，上月推出5項商場、商舖或停車場物業招標，招標物業包括柴灣峰華邨商舖與停車場、粉嶺嘉福商場、觀塘廣田商場、屯門兆安苑商舖與停車場，以及香港仔田灣商場等，物業面積由9,821方呎至59,053方呎。
林子峰：志在「心頭好」
而截至今年三月底，該批物業估值共12.69億元，當中以嘉福商場估值4.398億元最大。領展發言人同劉Sir講，該公司將審視接獲的標書，於適當時候公布結果。
領展招標物業常客林子峰話，今次僅入標個別商場，個人對可拆售車位嘅項目較有興趣，而旗下大角咀工廈恒昌中心拆售，已沽出60多個單位，佔整體約六成，料本周可沽清。
而蔡伯能就話，今次個個商場都有入標，對於「心頭好」出價較高，比較鍾意可拆售車位嘅嘉福商場及兆安苑。
廖偉麟話，有入標一個可拆售車位嘅商場，而旗下鰂魚涌御皇臺車位拆售項目，其中7個安裝咗電動車充電器嘅車位獲一名投資者一口氣購入，平均每個車位售價190萬元，項目累積沽出15個車位。
銅鑼灣舖跌租近18%
不過市場上亦有幾位投資者表明冇入標，「舖王」鄧成波就同劉Sir講，認為炒家會出高價入標，而自己購入只會用作收租，所以「費事爭」冇入標，目前正尋找低價優質物業作長線投資。
消息稱，銅鑼灣記利佐治街雙號地舖獲連鎖化妝品店以約70萬元續租，較舊租跌近18%。而中原商舖部稱，尖沙咀厚福街2A號地舖，以意向價約1.7億元放售。
美聯旺舖代理放售同區加拿分道香檳大廈前後兩個連約地舖，意向價約1.38億元。萊坊王振康指同區漆咸道南百樂酒店地下10、11及12號舖，以2.8億元放售。
劉Sir
App下載
