新聞資訊 > 地產新聞 返回
瀏覽人次 : 5476
地產新聞
幫仔女上車?先諗4大後果
(東方) 2017年6月16日
無視美國加息,香港樓市繼續癲落去,加埋嚟緊周日係父親節,絲絲即刻諗起呢啲!

各位慈父慈母,如果打算畀首期助仔女上車,外國專業財務顧問提醒,有以下四大後果要先諗諗。

1.【提防養成倚賴習慣】

須知閣下嘅寶貝仔女去到廿幾三十歲,已經係大個仔,唔係中小學生,早應學識財政獨立,應該知「粒粒皆辛苦」道理。

收入低?生活壓力好大?好難先儲到首期?阿爸阿媽後生時嗰陣咪又係咁。

幫仔女上車當然係無可厚非,不過要提防會令仔女養成倚賴習慣。可以的話,最好事先向仔女表明「只幫一次,供款唔會再幫」!

2.【得來太易唔識珍惜】

做人父母錫晒仔女係正常,但無條件喺財務上撐成年仔女,可能會害咗佢哋。就好似有啲人中咗六合彩後最終反而破產一樣,錢或上車機會得來太易,唔曉珍惜。

如果唔想「愛佢變成害佢」,做父母嘅,就要先狠心讓仔女從錯誤中學習,等佢哋學識理財兼明白錢得來不易,驗證埋佢哋唔係「月光族」後,先好出手幫佢哋。

3.【隨時反成仔女負累】

幫完仔女後,自己老來仲有冇餘錢照顧自己呢?若冇的話,將來可能更令仔女疲於奔命。

所以各位父母唔該自己搞得掂,有餘錢先好出手幫仔女,否則日後反而成為仔女嘅負累。

4.【小心自己臨老閉翳】

父母嘅血汗錢係一輩子辛勞嘅成果,得來不易,人愈嚟愈老,能獲銀行貸款機會愈微,除非申請「逆按揭」;相反,年輕人將來大把日子。都係嗰句,幫仔女前,要先肯定自己夠錢過老。

余絲韻