「一個人活到九十歲仲要為層樓而擔心，我覺得呢啲先叫樓奴。正因為我唔想做樓奴，所以決定趁後生買樓。」八十後的Rondy早於大學畢業後就置業，雖然中途有年半時間脫離樓奴一族，但去年決定再次上車，更揚言「以後唔會畀自己無樓在手」。究竟是甚麼原因令Rondy如此堅決？
現年二十八歲的Rondy與家人同住堅尼地城，手持同區一個私樓單位。他去年買入位於西環加多近山附近的單幢住宅，樓齡逾二十年，售價370萬元，建築面積約390方呎，屬業主急沽的筍盤。以為二十八歲就能上車已經很厲害，咁就大錯特錯。他在二十三歲之時，已經首次置業，而令他急於買樓的原因，原來是跟父親一度瀕臨破產的故事有關。
童年經歷促買樓決心
「出生小康之家，父母喺八十年代買入堅尼地城一個單位，死慳死抵將層樓好快供完。直至九七金融風暴，阿爸被裁而失業，一度有破產危機，但好彩仲有層樓住，所以呢個成長背景令我覺得有層樓好重要。」當年他只有十歲。
直至中六的時候，他參加了學校舉辦的師友計劃，有導師問他︰「一個人要有幾多錢先叫富裕？幾多錢先夠退休生活？」。此啟發他對理財的觀念，「面對人口老化問題，到退休時需要一筆錢解決住屋、醫療及生活開支，所以趁後生就要做資產配置。」
了解到理財重要，他大學時就開始開源節流。「大學時的支出集中喺十幾蚊頹飯同埋車費，我亦做過兼職救生員、補習、開小型興趣班，平均每月可以賺過萬元。」短短三年間，他已儲逾20萬元積蓄。
「大學畢業發現原來供樓仲抵過租樓，咁梗係買樓！當時用自己積蓄同埋沽空期指獲利的資金合共近40萬元，買入當時市值128萬元九龍灣得寶花園的單位，建築面積約370方呎，月供三千元，但放租都已經有六千元。仲記得當年銀行見我啱啱畢業，要阿爸做擔保人先批貸款。」
曾賣得寶單位賺百萬
不過，Rondy持貨兩年就把該得寶花園單位出售，皆因擔心歐債危機出現，「以為樓市會出現調整，如果銀行突然call loan就好大鑊，又見層樓升咗100萬元，所以賣咗先。點知愈升愈有，當自己買咗教訓。」
他形容，搵樓過程非常辛苦，除了考慮價錢外，還要研究單位間隔、交通配套等，故改變了他將來換樓的想法。「要揀啱心水樓真係好難，所以之後一定會先買樓後賣樓，唔會畀自己無樓在手」。
Rondy現於國際顧問公司任職顧問，年薪逾40萬元，單位則月供1.1萬元。雖然他指暫時沒有供款壓力，惟未到三十歲就要背負供樓債務，或是外界形容的樓奴。他卻認為，「臨老仲要為層樓而擔心，我覺得呢啲先叫樓奴。每個人的投資需要都唔一樣，只不過喺呢一刻對我個人而言，買樓係我最好的選擇。」
樓價合理 無懼冧市
香港樓價近期出現調整現象，再加上美國有機會下月重啟加息步伐，令樓市再添壓力。不過，去年再上車的Rondy指「未驚過樓市會冧」，更稱樓價雖然昂貴，但仍處於合理水平。
根據政府統計處資料顯示，二○一○年的香港私人住宅住戶入息中位數為2.5萬元，一五年首兩季平均升了約35%，至3.4萬元。他認為，香港人工升幅明顯，亦反映私樓置業者可以承受到更大的樓價升幅。
供不應求 跌勢有限
「舉例五年前，一個家庭月入2.2萬，拎1萬元供樓，做六成按揭並供三十年，大概可以買到400萬元的樓。五年後所有因素不變，月入加至3萬元，每月供1.8萬元，就可以買到近800萬的樓。」
他又指，香港樓市存在剛性需求，雖然近期樓市被唱淡，但直言從未驚過。「香港每年新增的住戶達4萬個，但政府最多推出的私樓單位一年得2萬個，從供求關係睇，需求永遠唔會被消化到。」
App下載
