閒置土地寧養蚊 房屋死結點化解

新聞資訊 > 地產新聞 返回
瀏覽人次 : 5963
地產新聞
閒置土地寧養蚊 房屋死結點化解
(太陽) 2015年11月24日
面對不斷惡化嘅房屋問題,港府好似打咗懵仔針咁,一味重重複複問「地從何來」,見縫插針、寸土必爭未夠,仲話要填海造地甚至放風要打郊野公園嘅主意添。學似學者話齋,港府與其捨近求遠,捨易取難,不如充分利用市區閒置土地實際啲,真係冇講錯o架。

係人都知,香港並非無地可用,只係未有妥善規劃嘅咋。有智庫日前建議港府將部分環境價值低嘅郊野公園改劃房屋用途。最好笑嘅係,高官呢頭話建議可以研究,希望市民喺魚與熊掌之間作取捨喎,嗰頭又話呢屆政府無此計劃,咁搞法盞自打嘴巴嘅咋。

既然填海同發展郊野公園都成禁忌,甚至諗一諗都被批評係患咗大腦癌細胞,咁房屋問題真係無解?有學者係咁講嘅,與其喺附近乜都冇嘅郊野公園劃地建屋,倒不如發展現時城鎮周邊土地好過啦。佢仲引用政府資料,指依家仲有數百公頃官地可作低密度鄉村發展,而現時新界平原亦有大量土地並非由村民擁有,呢啲閒置土地唔單止同原居民冇任何衝突,最重要嘅係接近城鎮,有齊基礎設施,只要適當規劃就可興建房屋,解決住屋問題話都冇咁易啦。

係呀,市區仲有大片閒置土地,如果都用來發展,的確可以解決好多房屋問題。再講喇,目前被私人會所霸佔但使用率奇低嘅官地都有幾百公頃,淨係一個粉嶺高爾夫球場咋,閒閒地都可以建造萬幾個單位;仲有嗰啲年久失修嘅政府舊宿舍,重建又可以安置唔少人口o架。一句講晒,唔係香港無地,而係官僚無能夾無腦,致使大量土地未能善用。真係有一日,市區閒置土地用晒,港府再講填海也好,發展部分郊野公園也好,阻力都冇咁大,係咪?

可惜吖,港府就係咁奇怪,大把閒置地皮唔用,寧願養蚊,結果咪拓土建屋淪為大隻講囉。港府承認,建屋遠低於目標進度,未來五年只能提供不足十萬個公營單位,比十年房屋大計嘅二十九萬個目標差好遠,咁就難怪三年上樓承諾成空,家陣平均拖到三點六年,查實拖五、七年都上唔到樓嘅唔係少數。

話時話,房屋問題尾大不掉,民怨已到爆煲邊緣。區議會選舉,激進派崛起就係警號,港府再唔解決問題,下次被佔領嘅就唔係馬路,而可能係政府總部咯,叮!