主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6716
地產新聞
樓市出更:工廈無契天台7.6萬拍出
(太陽) 2015年11月24日
另類物業受市場追捧,有拍賣行老友同劉Sir講,尋日拍賣會拍出一個由法院頒令拍賣嘅觀塘工廈無契天台,成交價只係7.6萬元,可以話係近年罕見嘅最細價物業成交,而呎價更加低至不足13元,依個價連一呎天水圍嘉湖山莊都租唔到。另外,聽講尖沙咀星光行天台廣告牌,亦有買家以約2.1億元出價洽購。

忠誠拍賣有代理話,尋日賣出一個由法院頒令拍賣嘅觀塘興業街中美中心A座無契天台,天台建築面積約5,910方呎,以約7.6萬元開價,以一開即售形式拍賣,結果就畀一組買家承價一口,成功以7.6萬元購入,代理就話好難喺市場上搵到同類物業比較。

如果照咁計,天台呎價竟然不足13元,依個呎價連喺嘉湖山莊一呎都租唔到啦。另聽講尖沙咀星光行天台廣告牌,亦有買家以約2.1億元洽購至尾聲。

安群街OK Mall招租

中原工商舖董事總經理潘志明同劉Sir講,由投資者持有嘅石門安群街1號1樓全層,命名為OK Mall,該層面積約6萬方呎,依家推出食肆部分招租,面積約2.1萬方呎,舖位面積介乎150至9,800方呎,呎租就會參考同區商場,介乎45至75元,預計明年中交樓。

港置旺舖助理營業董事游柏榮話,由資深投資者蔡伯能持有嘅元朗西菁街95至100號地舖,面積約2,038方呎,以約6,700萬元連租約放售,呎價約32,875元,依家舖位就由韓國燒烤店以16.8萬元租用,租金回報約3厘。另銅鑼灣白沙道雙號一個地舖,獲時裝店以25萬元短租。

金龍車位50萬易手

有消息話,由會德豐持有的中環環球大廈26及27樓頂層全層,獲超過10組買家洽購,但就仲未落實。另外上環一洲大廈地下至三樓,獲買家以1.9億元洽購。

車位方面,世紀21日昇黃文龍話,天后金龍大廈一個雙號車位以50萬元易手,業主持貨三年,僅僅獲利5.2萬元。另荃灣沙咀道雙號三樓停車場一籃子私家車車位及電單車位,獲買家以約3,000萬元洽購。

劉Sir