主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5577
地產新聞
公屋凶宅搶手 皆因一屋難求
(東方) 2015年9月16日
以前提起凶宅,人人避之則吉,不過今時唔同往日,一屋難求之下,無殼蝸牛唔理好醜,但求就手,連凶宅都變成搶手貨,講起都無奈。

嗱,新一期特快公屋編配計劃又爭崩頭,總共有一千二百個單位,首批只有七百多個單位,當中六個曾經發生兇殺案,包括屯門安定邨○二年發生男保母連環殺兩童案嘅單位。其他單位亦有唔少問題,唔係前住戶自殺或者意外身亡,就係鄰近垃圾房、受白蟻困擾或者被消防喉穿堂入室,總之多數係賣剩蔗。但結果一樣搶手,總共接獲八萬八千三百份申請書,超額七十三倍,創近年新高,都咪話唔誇張。

有頭髮冇人想做瘌痢,咁多市民申請特快公屋,連凶宅都唔介意,都係無可奈何嘅咋。中國人一向對凶宅好避忌,認為大吉利是,家陣爭崩頭,反映房屋問題日益惡化,無殼蝸牛為求有瓦遮頭,已經到咗飢不擇食嘅地步。

唔係嚇你,今日香港樓價與租金齊飛,劏房與籠屋一色,公屋已經變成無殼蝸牛嘅最大避風港。弊就弊在公屋嚴重供不應求,輪候冊人數早已衝破二十八萬大關,相信唔使幾耐就會突破三十萬大關,基層市民上樓難過中六合彩,咪惟有退而求其次,凶宅都頂硬上囉。正如有鄰近住戶慨嘆:「冇得住都要住,邊驚得咁多。」咁又係吖,家陣最怕嘅係無屋住,只要有得上樓,莫講凶宅,龍潭虎穴都大把人爭吖!

講起真係可悲,香港號稱國際都會,點知居住環境連第三世界都不如,好多市民上無片瓦遮頭,下無立錐之地。早前有調查發現,劏房、板間房及天台屋等租金持續上升,今年一至七月比去年同期平均增加百分之八點三,而住戶平均入息僅增長百分之一點八,基層市民收入遠遠追唔上租金升幅,導致愈住愈窮,愈住愈差。正所謂,愈窮愈見鬼,基層市民想唔住凶宅都唔得喇。

冇計喇,鬼叫港府無能咩,話就話將房屋問題列為施政重中之重,可惜有心無力,搞到房屋問題不斷惡化,成為市民不可承受之重。好似房屋署研究將置富道側前牧場遺址改建房屋咁吖,本來不失為增加房屋供應嘅途徑,點知環保團體聲稱喺現場發現古蹟、古樹及瀕危動物,要求保育為生態古蹟公園,睇怕建屋計劃隨時又胎死腹中。呢個就係香港嘅現實,港府唔係唔想加快建屋,無奈管治弱勢,阻力重重,要解決房屋問題仲難過登天。

咪怪功夫茶坦白,以港府呢種無能表現,房屋問題只會愈演愈烈,遲早連凶宅都無得剩吖!