主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7321
地產新聞
林瑞麟賣大宅狂賺3200萬
(太陽) 2015年4月16日
依家樓價高企,唔少擁有自住物業嘅業主只能享受紙上富貴,但政務司前司長林瑞麟近日就出售手上物業。市場消息指出,林瑞麟同家人名下嘅赤柱柏濤小築複式戶,啱啱連同兩個車位出售,售價高達五千萬元,實用呎價約二萬六千元,較十年前買入時作價一千八百萬元升值約一點八倍,即狂賺三千二百萬元。今次佢高價賣樓賺錢「袋住先」,莫非認為樓市已經見頂?

林瑞麟曾經係官場出名嘅樓王,該單位喺○四年四月、即沙士後嘅低位買入,實用面積約一千九百一十五方呎,屬自用物業,出售時連有租約,月租約八萬元。講起呢個單位都曾經成為外界焦點,事關四年前林瑞麟出任政制及內地事務局局長時,被踢爆住所天台有僭建帳篷同圍欄,當時林瑞麟矢口否認,惟其後自爆已將上述僭建拆除。

一二年六月底林瑞麟退任後,即到牛津大學修讀神學,自此鮮有出席公開活動。舊年底本報發現林瑞麟在港行蹤時,佢嘅身形明顯消瘦,精神唔錯。今次佢賣咗層樓,唔知係換樓定係睇淡後市呢?不過,袋住半億元咁爽,日後想點都得喇!