主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7538
地產新聞
林一鳴教你炒股買樓做作家
(東方) 2015年3月30日
香港人咁緊貼樓市行情,呢排更熱烈討論「細價樓爆煲論」,試問點會唔識樓市專家林一鳴博士吖!喺孖妹心目中,佢已達到男神級數;神在佢投資精準、口才了得之餘,仲識寫金融小說。難得今次同男神Q&A,試吓考佢投資心法之外,亦一於八卦到底,代各位姊妹發掘佢鮮為人知嘅一面。

林:資深金融業人士 林一鳴

講炒股:技術分析嘥氣 要識「聽話」

Kitty:今次我哋就明正言順咁問你攞「貼士」!波浪大師你咁忙,仲有無時間「捉浪」先?

林:A股持續上漲,「托住」本來已進入熊市A浪嘅港股,呢個情況第一次見,搞到港股波浪形態又亂又怪、唔會好似以前咁明顯。我相信中、港股市今年會繼續背馳,A、H差價愈來愈大,最慘就係炒AH差價收窄嘅人,會發覺愈炒愈輸。

仲有,以前投資可以睇基本因素,但依家步入政策市,最重要係睇消息同中央領導層嘅說話,所以事前嘅預測、分析真係完全嘥氣。我建議大家多啲接觸(了解)國情會更有用。近年我投資部署都數少咗浪;相比以前,依家數浪嘅準確度低咗好多。

快炒國策股有技法

彩兒:睇嚟股友日後都好難再靠炒股發達。

林:係非常困難!相信「快炒國策股」先係今、明兩年最好嘅策略,吼準內地新政策剛推出時就買入受惠板塊或個股,趁板塊上漲就獲利離場,一年捉到幾個呢啲機會已經夠。好似早前內地「兩會」炒起嘅新能源及互聯網股,以及近日受刺激做好嘅「一帶一路」概念股;預期「十三•五」計劃會陸續出台,係下一輪炒國策股嘅黃金機會。不過你問我四、五月出咩政策,真係天才都估唔到。

Kitty:你投資經驗咁豐富,會唔會收埋咗啲絕世武功,唔話畀我哋知o架?

林:我教你哋呢套投資策略,自己都用緊!例如我睇好今年A股仲有得升,滬綜指有望衝上4,000點,所以我五成以上資金都係買A股或相關投資。港股就無辦法啦,升唔上又跌唔落,惟有揀板塊炒。估計恒指全年會跌5至10%至大約20,000點。
講寫作:寫財技小說怎樣找靈感?

Kitty:聽聞你轉工後懶咗喎,無再朝朝跑步返工呢!

林:無喇,新公司唔喺港島區,無得由屋企跑步返工,一係要早到五、六點起身跑先得,咁惟有喺周末跑多啲補數啦。我平日工作好忙,夜晚放工又想返屋企陪吓家人,到十一點左右又要寫專欄同財經書。但我依然鐘意跑步時嘅專注感,因為跑跑吓會諗到好多嘢,就連我本新書《財技風雲》入面一半內容都係跑步時諗到。

彩兒:你本新書我一早睇完喇!推出唔夠兩個月已經加印再加印,睇嚟大家對金融小說好受落。

林:最初都怕讀者唔受落,估唔到反應咁好。我以前寫過好多財經書,今次想搞搞新意思,而且內容涉及孖展、配股、供股等較深概念,一般散戶難明白,所以希望小說形式會令讀者更易吸收。書中嘅知識都係自己多年嚟累積嘅經驗同所見所聞,人物、情節全屬虛構,但要將幾十樣財技知識串埋喺同一個故事,又要情節通順,真係好高難度。本書已經賣出約5,000本,依家已經開始籌備續集。
作家收入差過最低工資

Kitty:你投資咁勁,估唔到都寫得一手好字喎。其實你暗啞底係咪半個「文青」?

林:我由細到大都好鍾意睇書、寫嘢。對於我嚟講,炒股、買樓只係交易,係生活嘅一部分,好難變成興趣。做作家雖然金錢回報少,但帶來嘅滿足感最大。可惜喺香港,單靠做作家搵食都幾慘。二、三十年前、倪匡嘅年代都仲可以靠寫作生存,但依家只有一至兩成嘅書可以賣過千本。假設個作家好叻,分到10%以上版稅,但其實收入只得萬幾蚊。計番寫作時間,應該低過最低工資。

彩兒:不如你搞個簽書會啦,你啲擁躉一定好開心。

林:搞簽書會好奇怪喎,雖然自己未搞過,但試過喺書展期間出席座談會,通常啲人聽完後都係想問「冧巴」,唔係好關心本書,哈哈。
講買樓:樓價雖癲 唔代表快爆煲

彩兒:咦,我記得你係樓市大好友,睇本港樓價今年再升5至10%,係真唔係啊。

林:無錯。雖然依家樓價好癲,但講「爆煲」似乎太早。要樓市短期大冧,一定要有班人突然間受客觀環境影響而逼住劈價賣樓。但目前香港人對住屋需求好大,估計樓價會繼續乾升,只係成交會下跌。

Kitty:近日大家對80、90後嘅上車故事有好大回響。你都曾經後生過,當年嘅你係咪都覺得一定要有樓揸手?

林:完全唔係,不過,對於年輕一輩嘅無奈我絕對理解。我廿四、五年前畢業第一份工,同依家大學生嘅人工係一樣,但樓價就升咗10倍8倍。以前嘅年輕人對前途會有信心,知道只要努力就有出路,每年人工升幾十個百分點,畢業後打四、五年工已經買到樓,而且400萬元已經買到半山1,000呎豪宅。但依家嘅年輕人欠缺向上游嘅環境,就算幾努力,十年後都只得萬幾二萬蚊人工,要上車真係Mission Impossible,條數點計都計唔到。
畢業10年想買樓? 好難

彩兒:希望日後到你囝囝買樓時,樓價唔會再咁癲啦。

林:老實講我唔係太擔心,大家都明白有句叫「成功靠父幹」。其實盡量都唔想幫小朋友畀首期,但好客觀講,咁嘅樓價,如果本身無任何資產、無任何父母資助,畢業後10年內要買到樓非常困難。

Kitty:咁你炒樓係咪次次Win?

林:我都試過蝕住走,但蝕幅少過一成,最慶幸自己喺○三年沙士前走得切。當時我仲喺銀行做,比較貼近市場,見身邊個個都炒樓,feel到有唔妥,所以○一年左右決定將手上所有物業賣出,好好彩避過一劫。直至○四年三月我先再入市。

彩兒:靜靜雞話你知,其實我有成百萬私己錢,但唔想用嚟買「姑婆屋」,有無其他方法滾大佢?

林:各位學嘢喇!

Kitty、彩兒