主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6541
地產新聞
樓市出更:賣地攻「細」收益飆5成
(太陽) 2015年3月30日
政府呢幾年持續按季主動推地,所以每季庫房都有穩定嘅賣地收益。劉Sir知道,今季政府一共批咗8幅住宅、商業同埋工業地皮,總成交額加埋約莫144.394億元,按季大幅反彈咗約53%,仲係近11個季度以來,第十次季度賣地收益穩袋超過百億元。睇番一四至一五整個財政年度就始終缺乏大型地皮批出,所以本年度約488億元賣地收益,比起上個年度明顯減少約83億元,係近四個年度嘅低位。

劉Sir參考番地政總署資料,今季政府共批出8幅住宅、商業及工業用地,相比舊年第四季多咗兩幅。

缺大地皮 靠高價撐起

而今季政府共批出8幅地皮,牽涉地價更加比起上季錄得嘅約94.339億元,大幅增加咗約53.1%去到約144.394億元,係過去11個季度以來,第十次單季賣地收益超過百億元,足證政府按季推地下,庫房保持到穩定嘅收益。

而今季賣地收益出現回升,除咗批出嘅地皮數目多咗外,期內有多幅地皮以高價批出都係主要原因。

好似錄得最高成交地價嘅觀塘鴻業街、偉業街、順業街與海濱道交界商業地,由領匯(00823)夥拍南豐以58.6億元投得,成為政府賣地有紀錄以來地價最高嘅商業地,呢幅地皮仲成為今個年度地價最高嘅單一地皮。

至於今年二月以23.898億元批出嘅九龍筆架山龍翔道豪宅地,每方呎樓面地價高達20,534元,破盡九龍區賣地紀錄嘅呎價新高。

財年埋單 少收逾83億

不過,劉Sir發現,雖然地價係有上升趨勢,但係今個財政年度批出嘅地皮整體嚟講都係規模偏細,屈指一數有多達9幅地皮成交價唔夠5億元,以舊年四月批出嘅沙田大圍美田路住宅地涉額最細,成交價約莫1.48億元。

故此,拖累今個年度全年嘅地價收入減少,相比上個年度少咗83.38億元,計番跌幅大約14.6%,成為政府主動按季賣地以來,近四個年度賣地收入嘅低位。

劉Sir