近排零售市道麻麻，市場都睇淡舖市，但唔少投資者反而會趁機入市，事關業主叫價都無咁強硬。劉Sir發現舖位投資者黎永滔最近就以7,500萬元買咗佐敦彌敦道227號及庇利金街38號嘅一樓同埋二樓，亦即係以前老牌酒家北京酒樓嘅舊舖址，其實喺兩年前個舖曾經以8,050萬元賣出過，但後來取消咗交易，而喺上年底個舖市場估值就約1億元，依家低約兩成半賣出。
睇返土地及公司註冊處資料，彌敦道227號及庇利金街38號嘅金百龍大廈一樓同埋二樓賣咗7,500萬元。
新買家係GOLDEN INCOME（HK）LIMITED，公司董事包括黎永滔等，與黎姓舖位投資者同名。
資料仲顯示，原來喺一三年，個舖曾經以8,050萬元賣過一次，但之後就取消交易，喺去年底再放售，聽聞市值約莫1億元，依家成交價平咗約兩成半。而原業主就喺九○年以1,080萬元買入物業，計一計，個舖期間升值近六倍。
原來黎永滔本身持有彌敦道227號及庇利金街38號地下兩個舖位，仲喺一三年嗰陣招標過，當時兩個舖市值加埋逾5億元。
高威閣25車位極速沽
另外近排車位買賣交投唔錯，港置陳偉材話，由資深投資者陳秉志持有嘅柴灣高威閣50個車位，尋日首日發售，不足半小時沽咗25個，最高售價接近150萬元。仲有消息話，有個大手買家一口氣認購咗18個車位，涉及至少2,000萬元。
而受近月「反水貨」活動影響，該行林偉文預計，短期內受影響區域舖位交投步伐減慢，但就仲未見業主減價減租，料今年民生區舖位售價都仲可以上升10%，而租金則上升5至10%。
另消息話，旺角西洋菜南街雙號地舖，面積約1,700方呎，以約110萬租出，與舊租金相同。而該行黃寶偉話，活化政策即將暫停，料投資者趕入市，今年工廈售價同租金會分別升10%及5%。
商廈料今年價升一成
商廈方面，該行郭漢釗話，喺滬港通帶動下，預計今年核心區商廈租務成交由中資機構主導，佔核心區租賃約六成半，整體商廈售價及租金今年均至少升10%。
另中原唐苑雯話，尖沙咀新文華中心A座8樓12室，面積約1,788方呎，以約1,800萬沽出，呎價約10,067元。
劉Sir
App下載
