主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 32020    回應 : 44
文亮語
來自嘉湖山莊的歡呼聲
 
湯文亮博士
紀惠集團行政總裁
2016年8月9日

  公司有同事住在嘉湖山莊,今早同我講,昨晚嘉湖山莊的業主非常雀躍,因為昨日嘉湖山莊連創今年度新高,基本上今年買嘉湖山莊的業主,每一位都賺了錢,而且,升浪剛剛開始,連老C都由年初預測樓市會下跌三成,改口說有機會創新高,轉軚幅度很大,那些相信老C的人在年初將物業賣走就慘了。

  我相信最開心就是一位太太,在年初替她替兒子買了樓,俾那些話樓市會下跌三成搞到心煩,甚至叫那些專家食屎,佢話佢買得起,供得起,個仔又有需要,點解唔買,我相信好似那位太太的人尚有很多,表示購買力仍然存在,當那些銀主盤賣得七七八八之後,樓價便會穩定,甚至會掉頭回升,在今年初,我同樣話樓市會下跌,所以,食屎的專家應該包括小弟,不過,我並沒有話樓市會下跌三成,在年初,中原指數135點,我話最多下跌至120點,如果下跌三成,指數是95點,沒有黑天鵝事件,就很難會下跌三成。

  不過,又並不是全部住在嘉湖山莊的人都很開心,那些今年內將自住單位賣出而售後租回,別人的歡呼聲就是他們的慘叫聲。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

1. 有心人 2016-08-09 09:18:29
地產商怎能夠不愛有心人!!
2. 嘉湖林太 2016-08-09 10:09:39
哈哈,嘉湖山庄師奶夠霸气,佢眼光遠胜中原老施。博士講得啱,今年年初賣了樓的,依家喊都喊唔番。香港樓价居然從2003升到依家。😛😜☺️❤️
3. 嘉湖業主 2016-08-09 10:10:30
我舊年高位賣出自住樓等跌30%,宜家都開始慘叫.一年來,損失租金4%,浪費咗h+0.7 plan, 宜家再上車又要俾印花費律師費AA費,搬家睇樓,唉,人算不如天算.
4. 博士好波 2016-08-09 10:19:17

好友如LYC....歡呼聲

淡友如引刀....慘叫聲

5. 金樓玉衣 2016-08-09 10:28:50

to 3/f,

真定假?2014年後竟然仲有人會沽自住?

6. Tony lam 2016-08-09 10:53:13
價高量低最易搭棚、買貴一球當搭棚費、新樓散貨要二手做味精、更會引到好多塘邊鶴幫庒、老散可食一浸浪、但有量果時就切記散水要快 ! 但快極都縛你三年、都好 ! 想斬頭會猶疑好多、變相唔會爭相逃生人踐人、市埸秩序就可維持穩定、哈哈!即係辣招有料到、冇辣會點 ?  自己諗啦!
7. JCheung 2016-08-09 11:00:34
今年4月,算是以低劈價買番一間港島東的三房單位作自住,現在裝修得七七八八,全靠博士年初提示-自住樓啱價就買 及買樓要做足準備及廣交及善待地代。
其實,食屎專家第一位,必定是羅X聰,08年已唱淡,害人無數.....
第二位,應是陶X或X冬,2012年話樓價3年後,必定低於2012年價位,之後扮忙記講過...
倒數第一位,才是博士!
8. To4樓C兄 2016-08-09 11:09:26
信引刀的就慘叫聲,淡友引刀應該都係歡呼聲,並唔係佢買咗樓,而係咁都有人信,確立到自己的存在位置。
9. 收買佬 2016-08-09 11:14:04
>其實,食屎專家第一位,必定是羅X聰,08年已唱淡,害人無數.....

幫佢平反吓,佢係11年初夏時有叫過人買樓,我姨仔都係睇完佢哋交X銀行d 經濟研究flyer先走去買樓....(當然,佢都係淡的時候多,都係眼鏡碎一地之輩。)
10. 嘉湖林太 2016-08-09 11:32:35
嘉湖山莊業主林太今年初接受訪問表示,阿仔330萬元買入樂湖居兩房單位(專家指樓價跌一成?)嗰啲咁既專家,食屎啦!我哋唔係有見地,我哋係腳踏實地,唔聽專家㗎,聽專家意見就死啦。」

引刀,你今日吃咗未?
11. 引刀話:我吃飽了! 2016-08-09 11:38:43
嘉湖林太問引刀今日吃飽未!
12. 向饭民说不 2016-08-09 12:16:22
引刀目的是散步负能量。
13. 引刀話之2:引以自豪! 2016-08-09 12:46:51
我引刀喜歡食魚就食魚,食屎就食屎!吃得飽飽的使同你哋滙報嗎,唔係專家可以食到上報紙咩?
14. 二少 2016-08-09 13:14:58
長河兄話夠錢就買.咁唔夠錢點買呢?
好簡單,唔夠錢就唱啦!唱到跌返三五七成咪夠錢買囉.
各位唔好再怪D所謂專家同我地D淡友喇!好似無州燈神話齋:鬼唔知交租肉赤咩!
15. 紅魔鬼 2016-08-09 13:33:26
全部自high,有時真係忍唔住笑。惨叫聲多數係今年入左貨嗰班人。
16. JCheung 2016-08-09 13:34:09
收買兄,羅X聰於2011出了一本書,數據詳盡,圖表精美,預期樓市必死;早幾年,城市論壇勁窒老C,因當時老C睇好樓市;08/09年,條友除了睇淡樓市,叫人沽自住樓,重教人將吐現的錢,沽澳元,因為條友08/09睇澳元對港元由5.5跌至4.0。
條友窒人就叻,對自已估錯就隻字不提,食屎專家第一位,非佢莫屬!

18. 紅魔鬼 2016-08-09 15:20:35
世界在變,QE已經再救唔到經濟,QE即將告終,你可從日本最近既放水量化變成𨍭移到增加政府開支的財政政策裹面見到,中國已表明QE對現今已經無效,就算有國家再有QE,都不會有驚喜,此外,美國加息係已成事實,首次置業既朋友要小心,無需因為傳媒不斷喧染樓市點升㸃升,盲目被ㄧ班地產經紀慫恿下入市。
19. 本地人 2016-08-09 15:49:38
作為博士既你有咁樣既睇法真係不該,我都想知賣左樓去租樓,有何問題。唔好話賣後𨍭租,有好多連樓都租唔起既香港人,咁可以比乜反應呢班人呢?
20. CD ROM 2016-08-09 15:56:38
以前大西北比人話升得最遲又跌得最快, 宜家要改口啦, 升得快跌得快先真~~~
21. 引刀一快 2016-08-09 15:58:25
慘叫當呻吟,十兄弟輪大米協奏曲,真係過癮。


22. 歷史長河 2016-08-09 18:37:28
智慧在民間,林太加油!
24. 德哥 2016-08-09 22:13:44
我都係相信了羅X聰于2012年賣左第一城收租果層樓,層樓算係優質,高層遠景,賣個價比起舊年高峰時少左兩球,當时真系非常後悔相信果條食屎專家,幸好年初因為自住須要搬離父母家買反當時跌得最金既嘉湖,所以真的真的不要相信這些所謂專家,佢咁犀利就唔使打工啦。
25. 蕭峰 2016-08-09 22:44:57
恭喜樓上德兄再入市,都算平衡返。

我身邊都有人12年時賣左自住單位,跟住租返來住,因為相信樓價最少跌三成,等跌三年,租金都幾金,因為佢係三房優質大屋苑大單位,唔知今年入左市未呢?!

26. 無奈 2016-08-09 22:45:51
蕭兄,如不跌3成,不足以令人放賣的,有數得計啊。
27. 歷史長河 2016-08-09 22:50:19
人最難戰勝的是自己,好多人正是如此賣咗之後再也過不了自己心理關,從而放棄再置業。硬淡就是這樣練成的。
28. 假難民 2016-08-10 00:10:19
24樓老徳

你老吹成份指數極高@@
29. 85後已上車 2016-08-10 08:49:42
大約半年前, 我買左樓, 雖然只係細價樓, 但當時正在恐慌之中。 當時買樓, 個個朋友都話我蠢, 話而家去買樓, 唔知死字點寫。 D親戚,長輩, 朋友, 得間飲茶食飯時竟有人時不時問我層樓跌左幾多。

今日, 博士呢篇文章, 即使叫唔上好友既「勝利預告」, 都已稱得上「不敗宣言」。 最近差唔多大既朋友都好落力去睇樓, 似乎下定決心, 但現在各區上車盤價格對比最恐慌時, 市價都有升番差唔多10%左右, 而叫價則更高了。差別實在太大, 感謝博士。

回想當初有人不識泰山, 仲「教」番博士睇樓市, 都覺得場面趣至。 
30. Ca1on 2016-08-10 09:19:09
我就唔信有人會信羅家聰.
2015 大時代前或者2016大跌之後買啲正常大小嘅單位我覺得都唔需要擔心. 唯一係股市爆上後嗰半年至九個月入貨就贏面細啲. 其實如果能夠喺適當時候操作, 股樓都可以賺錢. 市場風險大時, 就玩少啲三四線, 賭少啲, 好似小弟前排入嗰啲藍籌股就升幅唔錯了.

31. 二少 2016-08-10 09:41:05
恭喜85後已上車,係低息大時代,唔借錢已經係輸咗.
32. 引刀一快 2016-08-10 11:44:50
勝利?幾耐冇入貨呀?
33. 二少 2016-08-10 12:23:26
唔知係咪真係幫近期入咗貨嘅人俾辣招稅?
34. 引刀fa1 2016-08-10 13:48:20
我偶像講過嘅一定認頭,冇唔認咁衰仔嘅。
35. 引刀一快 2016-08-10 16:42:23
係,講得出做得到,你係咪摩頂買先?
36. 二少 2016-08-11 02:24:20
唔知一手算唔算呢?
37. 引刀一快 2016-08-11 22:17:53
當人茂利,AA買一手,佣都賺死喇。
38. 打工仔 Andy 2016-08-11 22:52:52
依家d黑天鵝出現, 變咗係央行量化寬鬆嘅籍口! 
39. 二少 2016-08-12 12:21:49
咁即係只限二手樓?摸頂點定?我老友上月真係摸頂買入咗個港島單位,新聞都有賣,若然有人幫佢俾辣招稅,咁就真係幫老友講聲多謝!
40. 二少 2016-08-12 12:40:30
咁唔係地代係用家買入一手單位,而買入價係該新盤暫時最高呎價又係咪有人幫佢俾辣招稅呢?多謝!
41. 引刀一快 2016-08-12 13:50:36
我落場揀二十個盤,你接邊個都得,只限香港人,我就代繳DSD,講得出做得到。
42. 好消息 2016-08-12 14:29:57

引刀一快話同20個香港人俾DSD,大家快D出去搵客呀。

43. 二少 2016-08-12 14:38:39
原來要你指定,咁你揀出來啦!唔好揀到出年喎!雖然取巧,但都有誠意.
44. 二少 2016-08-12 15:24:27
即你話已經買咗就唔認數,各位師兄留意.
45. 二少 2016-08-12 15:38:40
本來只係話現在買就幫人俾辣招稅,修改為香港人買佢指定嘅20個盤先俾.咁問多句,香港人持有公司買又得唔得?
46. 引刀一快 2016-08-12 20:39:23
首先,你想攞優惠,show個正身出嚟先!地産商代付BSD都要對番人頭架嘛。

鬥牙鉸,係針對你地,唔係全港市民,呢個游戲係針對你地日日唱好,咁就唔該做榜樣買咗先講喇,若果你肯摸頂買,我俾DSD又如何唧。既然你地話樓市會升,又慳咗DSD,有著數丫。

想全香港都唔使俾DSD?搵梁特首傾下咪得囉。咁傻嘅。