主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 34513    回應 : 18
文亮語
買靚樓之琵琶行
 
湯文亮博士
紀惠集團行政總裁
2015年12月23日

  今次美聯儲局加息,耶倫好似白居易「琵琶行」裡面所描述的那位小姐,不但要千呼萬喚始出來,還猶抱琵琶半遮面,宣布加息之後,又話加息是會緩慢進行,即是什麼意思,加就加,唔加就唔加,不過,我的演繹就是最低限度下一次議息是不會加息,否則,講什麼緩慢進行,加息對於業主來說,當然不會是一個好消息,但對於打算買樓,準備做業主的人來說,就是一個好消息,因為,加息的確會令樓價下跌,但我並不是說,現在是買樓的好時機,始終都是要慎防加息,今次加息,只是一個序幕,相信有很多業主會彈琵琶,不過,未成曲調先無情。

  在過去兩三個月,有不少撻訂個案,現在的信息相當透明,單是在十二月份,新樓盤的撻訂就超過三十宗,報紙以殺訂幾百萬來形容撻訂,好似一個好消息,老實說,地產商一定不喜歡殺訂,就算可以有幾百萬收入,對整體銷售,不但於事無補,而且可能給予市民負面訊息,認為那個樓盤的樓價太貴,情願放棄訂金,到最後,可能要減價才可以促銷,以前的地產商將那些撻訂個案叫彈琵琶,即是在足球場上,足球員連那些放在龍門囗的波都射唔入一樣,唔好問我點解,我唔識。最令人擔憂的是那些撻訂個案是在加息之前發生,加息之後,我相信出現的次數會更多,而那些殺了訂的業主如果要將物業出售,就一定要減價,數目太多,對整體一定會有影響,如果一定要買樓,不妨考慮那些被殺訂再重售的物業,我深信會有部份業主失去信心,要減價促銷那些殺訂貨,因為有那些撻訂買家幫補,未必一定會入肉,那個撻訂買家就輸梗。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

1. 引刀一快 2015-12-23 08:55:12
其實,撻訂有時都唔係咁傷嘅啫,亦係“止蝕”嘅一種形式。考慮未來走勢係買物業重要嘅一環。

住,係剛需

賺錢,係剛需中嘅剛需

唔想蝕錢,係剛需剛需剛剛需

2. 笑啖渴飲 2015-12-23 09:18:50
刀兄既剛需論令我想起某位網友, 卻又偏偏醒唔起係邊位, 可能最近見得佢少.

但係, 我覺得有D概念要搞清楚先, 願望歸願望, 有能力去達成既願望先算係需求.
好多人其實係咁:

住,係願望

賺錢,係願望中嘅願望

唔想蝕錢,係願望願望願願望

點睇?

3. 引刀一快 2015-12-23 09:28:29
笑談渴飲兄

我同意“有能力去達成既願望先算係需求.

不過,願望一詞,有好大被動性,我認為社會上大部份人都正在爲以上三項而奔波或操心,主動意味濃厚D。
4. 真真薯片 2015-12-23 11:34:12
在下記得, 幾個星期前, 大家係度拗市道好定唔好, 在下建議大家可以留意超人元郎大盤銷情, 因為相當有參考價值

唔經唔覺就幾個星期, 超人大盤仲未賣晒, 依家要留意既, 係加息後第一個超人大盤幾時賣同賣成點
5. 元朗 2015-12-23 11:51:51
超人元朗盤1千個單位只賣出600個 , 係今年長實最差反應的樓盤
6. 鄧學士 2015-12-23 12:57:32
刀兄,謝主龍恩!
7. 笑啖渴飲 2015-12-23 14:58:46
真真兄有見地!
8. 路人甲 2015-12-23 16:03:59

買樓有時候似入賭場落注咁, '' 買定離手'' ...!
眼見前面半天都係開[大](買樓一樣) , 以為會WIN, 點知出番[小]幾舖(樓價回落), 
人就一定會窒窒下, 猶豫架拉.
到跟住再繼續都係[小]為主的情況下, 乜會有人會買[大]咩?
風水輪流轉, 我地就會膽怯架拉...
心理多於一切.

不過, 話又說回來, 樓宇升跌應該比買大細容易睇D 怪.....


9. 西門吹雪 2015-12-23 16:09:29

真真兄所言甚是~

其實賣倒6成以上已經唔係太差,最近見到既成交呎價已經止跌,甚至略有回升。不過,我地可以見到既成交係慢一點的,相信未反映加息後既情況。估計未來1-2星期CCL好可能止跌或者微升。加息既影響,其實暫時仲未見到,起碼要1月中既CCL先反映倒。單靠報導不能盡信,但如果真係確認加息後再次下跌,下一個長實盤可能3成都未賣倒。

10. 神祈小子 2015-12-23 16:18:12
樓價愈跌,就愈多撻訂個案,如新盤如是,相信二手也不會好幾多,真的如博士所言要跌到一個階段,到達成交量增加,樓價回升,才是放心入市的機會。

 


11. 西門吹雪 2015-12-23 16:35:46

掛住回真真兄,忙了講反博士編文~~

其實撻訂亦係手段既一種~~如果0係淡市,高手買家(多數用殼公司)會希望成交期有咁長得咁長,萬一樓市再跌就撻訂,升就成交。真正係輸"撻"盈要,所以撻訂亦可以撻得有技巧,以訂金買個機會。

12. 打工仔 Andy 2015-12-23 16:41:39
焗住撻訂! 買樓不是買菜, 落訂前請想清楚!
13. 望東樓 2015-12-23 19:37:16
甲君,

金融市場同賭場最大分別係理論上無人能夠影響到下一鋪開大定開細。

而當好多有錢但未有樓或者有樓但未買夠嘅都覺得啲樓會上,咁啲樓就會上。但到咗睇好嘅都買齊貨,咁就li dung da。
14. 望東樓 2015-12-23 19:51:02
早兩日信報有篇文章講到發展商提供嘅按揭雖然首期低,但三年後利息係P+x。如果篇嘢冇老作,咁而家個班靠呢個方法上車嘅就係預咗:

三年後樓價上咗可以搵銀行轉按(或走貨)
and/or佢加咗好多人工
and/or金管局放寬按揭比例

如果以上三件事都唔發生,咁就苦過弟弟。
15. 真真薯片 2015-12-23 20:05:18
西門兄,

香港d傳媒, 不論地產新聞定其他新聞, 都只係為金主服務. 依家表面一遍風聲鶴唳, 不過都係等下一次差估處數據先至可以作準

就算真係劈劈劈, 市場上冇持貨力被迫賣樓既業主又有幾多? 坐唔住貨既發展商+被迫賣樓業主vs弱化左既剛需, 誰勝誰負都仲係好難講
16. LYC 2015-12-23 20:15:16
明知未來私樓供應不足,因為D土地拿晒去起公屋,發展商只會慢慢出貨,最近樓市調整正好把握機會入貨!
劏戶租金持續高企,拿晒d地去起公屋到唔夠!
17. 真真薯片 2015-12-23 22:13:23
在下突然諗到個問題, 係有關上次13按果單成交, 就係買銀主盤既風險, 例如

1/ 業主層樓值500萬, 借爆借到550萬
2/ 財仔於是逼賣
3/ 買家還價450萬, 業主想賣, 買家落細訂十萬
4/ 簽臨約後財仔反悔唔賣, 成交唔到
5/ 本來買家可以向業主追返雙倍訂, 但係業主係破產邊緣, 追佢都冇用
6/ 財仔一於唔理, 因為臨約唔係佢簽

咁買家果十萬點算? 有冇高手師兄可以講解下?

18. 朗晴 2015-12-24 16:20:09
5樓

[on.cc東網專訊】 長實地產(01113)高級營業經理何家欣稱,元朗世宙累售逾650伙,佔可售單位約75%,套現約38億元,

去到本月16號已售出650個單位(或75%可售單位),何差之有呢: