主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 29684    回應 : 13
文亮語
毛澤東怎樣看加息
 
湯文亮博士
紀惠集團行政總裁
2015年12月21日

  我依稀記得,毛澤東曾經講過,在戰略上要重視敵人,戰術上可以輕視敵人,有人認為這是業主對租客應有的態度,我絕不同意,業主怎會將租客變成敵人,如果真的有此心,索性唔好租俾佢,租咗之後又希望租客變成敵人,希望佢生意唔好,入不敷支,連租都交唔到,最後,損失的是業主,同租客過唔去,即是同自己過唔去,咁蠢的事我一定不會做,我認為毛澤東的說話,用作業主怎樣看加息才對,我們非常重視加息,在戰略上已經做好防範,現在就算業主唔做,金管局已經替業主做了壓力測試,加息,為什麼要害怕,唔會因為加息而在沒有壓力情況下賣走一些物業,一切如常便可以。

  現在來說,加息並不是影響樓市最大因素,供應才是,明年有大約二萬六個新樓單位供應,我們亦很久未接觸過如此龐大供應量,就算是地產商,都有一點不知所措,因為在過去幾年,新樓供應大幅少於需求,做成長期供應不足,適逢低息環境持續,經濟頗佳,在差不多全民就業情況下,樓價節節上升,但成交量一直減少,表示一般市民非常重視這個敵人,拒絕入市就是他們的戰略,如果,加息真的是可以令香港樓價下跌,到某一個程度下,市民在行動上就會輕視這個敵人,他們會買樓。不過,理論還理論,有很多在今年內買樓的人都認為美國不會加息,就算加息都唔加得幾多,幾乎可以不理,那些人的戰略,就是輕視加息這個敵人,當耶倫宣佈加息,他們就誠惶誠恐,擔心樓價會大跌,他們不但重視加息這個敵人,根本是害怕,如果不是有SSD鎖住,他們就會立刻賣走剛買入的物業,所以,在投資學問裡,毛澤東思想,都是不落的太陽。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

1. 打工仔 Andy 2015-12-21 08:55:24
同租客關係好是好重要, 有商有量大家先開心!
2. 真真薯片 2015-12-21 10:05:28
明年供應量好似好多, 但係大家唔好忘記, 發展商係識的囤貨, 過去三四年, 每年年頭報紙都話明年供能接近兩萬個, 而每年年尾賣單, 都係萬一二個, 即係傳媒同政府既forecast連續4年都估大, 而最後實數每次都係forecast既六成左右

在下認為. 明年供應多定少, 主要睇市況, 市好自然供應多, 市唔好就睇唔好到咩地步, 如果股市經濟爆大鑊, 冇發展商敢賣樓, 明年新樓供應又得返萬一二, 都唔出奇
3. stanley sze 2015-12-21 10:18:18
同意打工仔兄所言
4. 西門吹雪 2015-12-21 10:27:33
真真兄所言甚是。
供應量最大敵人正是地産商本身。政府一路話推地加供應。其實土地會自己變成供應嗎?中間計少左地産商屯地屯房既影響。86000如果俾地産商收埋,唔知最後剩反幾多。
政府如果真的有心加供應,必須解決呢個問題。徵收空置稅,收緊賣地條款,令地產商喺更短時間內起好樓並推出市場。
5. ahchiu 2015-12-21 11:43:11
發展商係識的囤貨, 現在為什麼低過二手價出貨呢?仲要賣唔晒!!

做生意要貨如輪轉,
你囤貨居奇,樓狂升就緊係正啦
樓唔升, 再加息,
只係利息資出, 燈油火蠟, 人工
發展商真係咁有實力, 咪囤貨囉

其他無咁有實力的, 繼續投地起樓賣樓, 貨如輪轉, 理得你

6. 樓上好恨樓價跌 2015-12-21 11:51:27

君不見發展商狂推蚊型盤,正常家庭用盤欠奉。在我看來,無他,幫689連任前口頭meet target咯,叫年青人莫上街上的甘多!

7. Sugar 2015-12-21 11:54:10

博士:

毛這句話我也記不清~~

"百度"了一下,結果是:"戰略上藐視敵人,戰術上重視敵人"!

8. 西門吹雪 2015-12-21 12:04:40

其實大地產商既實力真係唔可以睇少。呢幾年賣緊既樓都係早年2-3000蚊呢呎投反來既平地。仲要大把好友話地價係咁升,樓價起碼要15000呎,地產商先有合理回報。可以想像大地產商呢幾年有幾肥。

無錯細地產商可能急錢回龍,可是而家佢地所持地皮主要都掌握於五大地產商手中。我地當然希望佢地競價式賣樓,但係人家都唔係省油燈

9. 真真薯片 2015-12-21 13:09:33
五樓, 

在下睇係, 由於購買力太低, 地產商已經囤左貨之後賣出黎既數量都托唔到市, 所以出現開價低過二手樓

至於燈油火蠟, 其實地代就係發展商外判出黎既銷售部, 囤貨成本唔高, 否則陳x宗就唔會一坐十幾年啦, 要迫發展商賣樓, 在下認為最好辦法係將賣唔出既土儲起居屋夾屋, 由大陸發展商起, 一方面搶左發展商土地資源, 另一方面盡吸市場購買力, 發展商見面粉同客人都被搶走, 就識驚啦

不過發展商當中起碼超人唔會囤貨, 其他就真係難講
10. 西門吹雪 2015-12-21 13:49:11

真薯兄~超人呢幾年出多入少~~佢唔單止無囤貨,反而係眼光奇準,低位買地,高位散貨。早排比人話佢徹資,先應市入反塊地。此等眼光,難怪可以咁成功。

有人話佢徹資? 唔好話我話,過2年樓價回反多少,肯定佢地又狂掃地皮。人家既智慧之高,非我等可以想像。

11. 真真薯片 2015-12-21 14:54:41
西門兄, 咁要等超人大手入市先買樓就冇錯, 依家未係時候
12. 神祈小子 2015-12-21 18:38:00
加息心理因素大於實質影響(除非你做了大槓桿按偈),買樓者只要好好地俾心機工作,長期保持正數現金流,避免加息影響工作表現,俾人「炒魷」仲大鑊。
13. 狗頭貓 2015-12-21 18:54:11
業主和租客不應敵對 , 政府和地產商也不宜敵對. 高價投地後政府出乜招物招 , 對地產商亦有不公 . 政府期實應和地產界密切溝通 , 才是市民之福 .