攣毛篇
我舊老細攣毛嚟香港個陣係我哋最趴街嘅日子,亦即係02-03年倒。公司畀佢嘅房津(可能係早幾年定落)佢住咗上山頂。佢好有語言天份,識講西歐各大國語言,一來到就問我地學普通話好定廣東話好,咁我哋話俾佢聽廣東係好難學嘅而且好大局限性,要學一定去學普通話。自此公司就多咗好多歡樂時光啦。佢自稱細個同班法國仔係泳池度玩咗一個暑假就學識法文。
過咗兩年攣毛竟然話畀我聽佢係soho果邊買咗間樓,叫我搵人幫佢執一執然後租出去。我當時都擦哂佢鞋讚佢有頭腦,係蘭桂坊隔離買樓租比expat真係有諗頭。之後佢有無加碼就唔知啦。後來公司cut房津,佢係西貢再買多間屋自住,話係扎根亞洲咁講。佢相信世界未來發展嘅中心會係亞洲同埋中國,所以一定留係呢個地區。其後我哋先後離開公司,有次係街到見返佢,佢仲話啱啱去完清華學中文。
不過我相信佢係西歐嘅高稅率、高福利社會長大,發現大部份人唔係努力工作而係睇下點樣係現有制度之下分到最多著數,長遠落去應該無運行。相對嚟講我哋個15巴仙稅真係人間天堂。調轉頭我哋去到佢成長嘅地方,發現係呀阿茂都住間大屋,組band政府有津貼好可能話果度係天堂一樣。
實情係萬物保持一定距離最美麗。
重點聲明:故事人物純屬虛構,如有雷同,實屬巧合。