序
終於發覺上網吹水原來係會上癮嘅。唔上來『討論』尤自可，眼見人地係度開壇咁開心，唔俾我發表下就周身唔聚財。但睇下人哋牌面已經係舖王／(收)租霸，我點充都至多係豪華限量版獨木舟。係無得片嘅客觀因素底下唯有寫下人生旅途入便幻想過幾個係物業取向方面比較凸出嘅人物。而家暫時諗到下列幾個：
女神篇
六戒篇
攣毛篇
大、中、細Trader篇
收租（外）婆篇
重點聲明：故事人物純屬虛構，如有雷同，實屬巧合。
女神篇
女神有幾個特質，而最特嘅就係右腦強悍無匹。算數字無特別，但算人心就非常深入獨到，永遠會用用佢獨有嘅感知、觸覺對你作出全方位『估算』。點講呢，如果佢識得你、同你交過吓手，你同佢show hand係好難贏佢。咁加埋我呢個主要用左腦嘅就真係天衣無縫啦。
雖然係用右腦，但相對於其他女性，女神多咗七分理性，少咗五分感性。對身邊大部份事物都有獨立見解，好少（但唔係冇）受到其他人嘅行為所影響。再加上逆向思維嘅我用埋彩數，好幸運咁避開過去係金融市場上嘅幾場大劫。
女神嘅原則性極強，其中一條天條就係『必有一樓』。話之你泡沫又好，冧山地震海嘯都好，沽咗層自住樓係無商量嘅。咁小弟只可以係呢個大前題底下操作勒。不過咁，除咗啲hedge funds可以long and short，普通基金經理都只可以long the market而唔同基金嘅表現係可以大相逕庭嘅。喺三D政策出現之前，響客觀因素許可之下你係完全可以係只揸一層樓而仍然ride the market according to your view。比方如果你對後市有信心，你係可以兩人住半山／山頂一千到千五呎（即係擁有比你想擁有嘅終極理想單位更高一層次或者係相對最接近嘅單位）即係overweight；相反就可以搬落山腳／細啲／舊啲嘅單位即係underweight。
女神亦斷捨離流派港區開山大弟子，同我呢個草根環保男就矛盾重重啦。其一係對於草根嚟講，呢個世界上係無廢物嘅，拋棄啲有用嘅嘢叫做折墮，同埋真係冇呢個習慣。其二係我其中一個師傅教落擰螺絲用螺絲批白痴都識，你嘅價值在於係冇螺絲鈚嘅情況底下搞掂粒螺絲。咁就搞到係我心目中好多垃圾仲有九十七種用途。嚡，你話點收科。
睇番轉頭女神同我都係個隻做大件事之前諗通諗透，永遠只係承受calculated risk。唯一例外好似只係完全相信對方，當然包括錢，所以要達到目標嘅難度只係人地既一半。但就真係高風險行為。奉勸大家想學之前一定要對自身與另一半有充分了解。
後面幾篇其實已經寫好，睇下大家有興趣睇邊一篇先。
App下載
