主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5532
地產新聞
辣招治標唔治本 安居置業夢難圓
(東方) 2016年11月21日
南方人大多飲食清淡,一食辣嘢就滿頭大汗,「微辣」都頂唔順,要「BB辣」至掂。北方人就唔同講法嘞,直頭無辣不歡,愈辣愈歎。其實市場對港府推出樓市「辣招」嘅反應都係一樣,打工仔上樓就話愈來愈難,但完全無礙有錢人嘅掃貨意欲,你話係咪吹脹吖!

呢,港府月初推出加強版「從價印花稅」,針對購買第二個住宅物業劃一徵收百分之十五印花稅,原本諗住壓抑市場需求,阻止樓價狂飆,點不知適得其反,辣招呢頭推出,多個屋苑嘅成交價嗰頭應聲打破歷史新高。其中紅磡一個樓盤,據聞就有內地買家大手筆掃貨,淨係買家印花稅同新印花稅,加加埋埋超過七百萬元,問你怕未。

出現呢個情況,其實一啲都唔令人意外。喺人民幣貶值以及內地樓市調控等情況下,內地資金外流嘅壓力愈來愈大,本地投資客及內地豪客將辣招影響計埋落成本,計過度過發現有so,自然照樣重錘出擊喺香港入貨。咁就難怪大部分接受「東方報業民意調查」訪問嘅市民,都認為新一輪加辣對樓市只有短暫影響,部分受訪者甚至擔心新辣招殺錯良民,最終弄巧成拙。

市民嘅擔心絕對唔係多餘。大家有眼見,以往所謂「辣招」出籠,好快就被市場適應,樓市靜完一輪又試掉頭回升。最慘係買賣成本增加,投資者待價而沽,放盤數量減少,真正用家反而更難上樓。正如上述民調顯示,大部分受訪者認為辣招治標不治本,根本無法解決供求失衡問題。

話時話,人民幣貶值、國際熱錢尋求避險,本港的確無法喺呢啲「大氣候」下獨善其身,但如果唔係港府拓土建屋寸步難行,房屋單位長期供不應求,樓市都唔會好似今日咁火上加油,癲處未算癲喇。港府成日吹噓私樓供應達標,實際上好多一手新盤都係不設間隔嘅「納米樓」,所謂「達標」,水分多於一切。市場預期未來供應繼續短缺,「有買貴,冇買錯」咯喎,樓市想健康發展都難。講到尾,房屋係剛性需求,點樣加辣都係無用,盞扭曲市場、加重無殼蝸牛痛苦嘅啫。上述民調又顯示,近七成受訪者直認無法安居樂業,已經放棄置業夢想,即係哀莫大於心死喇。

不過又唔使咁心灰嘅,市民難圓安居夢,催生另類畸形住屋市場,家陣啲劏房愈來愈細,豬欄、雞竇改裝嘅固然可以住人,下廁上房嘅「夜來香」亦有價有市,仲有淨係夠瞓一個人嘅太空艙,月租四千零銀就有交易,不妨諗諗佢吖!