主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6087
地產新聞
資助房屋無人吼 樓市漲跌百姓苦
(東方) 2016年5月17日
曾幾何時,樓價長升長有,「買磚頭保值」、「有買貴、冇買錯」被唔少人奉為金科玉律,首批新居屋上市被人爭崩頭,超額認購逾百倍。點知今時唔同往日,新盤開售居然出現拍烏蠅嘅奇景,樓市氣氛冰火兩重天,十足十玩過山車咁。

呢,市建局位於啟德嘅資助出售房屋項目煥然壹居售樓期即將結束,尋日原本有四十名申請人獲邀揀樓,點知最終集體甩底,齊齊no show。咁都未算,據聞煥然壹居出現第二宗撻訂,以樓價六百二十八萬元百分之五訂金計算,買家損手超過三十萬離場。喺咁嘅情況下,市建局將廿二個賣剩蔗單位保留供市民申請,到底有冇人肯接,真係一啲都唔樂觀。

冇錯,煥然壹居作為資助房屋,定價脫離市場,折扣欠吸引力,而且限制多多,固然打擊入市意欲,但市民對樓市前景悲觀,先至係臨陣退縮嘅最重要原因。早排有人預測本港樓市將大跌三成,已經夠晒驚嚇,最近更有國際大鱷形容現時本港樓市正處於「自由落體」(free fall)狀態,情況比九七年金融風暴之前更差。睇番數據,本港負資產宗數今年首季比舊年第四季激增多倍,資產質素惡化迹象愈來愈明顯,照咁睇淡友似乎唔係危言聳聽喎。樓市跌跌不休,前景不明,置業分分鐘變負資產,梗係現金為王,睇定啲先喇。

本來呢,住屋係生活必需品,樓市升又好跌又好,只要有能力繼續供落去,就可以同樓市鬥長命。問題係經濟形勢空前嚴峻,零售市道疲不能興,旅遊業跌跌不休,失業率掉頭回升,連龍頭大財團老闆都驚呼情況係「二十年最差」,中小企更加冇可能捱得住。打工仔飯碗隨時不保,仲講咩買磚頭吖,萬一斷供點收科?臨陣打退堂鼓,都係人之常情啫。

始終都係嗰句,樓市問題係一把雙刃劍,樓價過高,無殼蝸牛固然怨聲載道;樓價急跌,小業主物業淪為負資產甚至變成銀主盤,不知導致幾多人間悲劇;至於未上車嘅,好多都因為對前景冇信心而唔敢入市,焗住繼續租貴樓。所以話啫,樓市升,百姓苦;樓市跌,百姓苦,多少人被小小蝸居玩殘,簡直苦過弟弟。

好嘞,經濟下行,樓市逆轉,失業率上升,照計港產官僚應該拿拿臨做嘢。可惜吖,港府出名渾渾噩噩,得過且過,面對樓市問題束手無策,一味坐等運到,連檢討「減辣」措施都嫌費事,反而一味以「壓抑樓市有功」而沾沾自喜。當年亞洲金融風暴殺到,港府仲搞出個八萬五,結果加速樓市崩潰,家陣環境仲惡劣過舊時,港府仲係不知變通,負資產遍地一幕會唔會重演,真係冇人話得埋㗎。