近排市況回軟，銀主盤開始湧入市場。有拍賣行就話，自從舊年下半年樓價回軟，依家銀主盤流通量已經倍升到約100個，仲話今年底會再倍增到200個咁話。有銀主務求盡快將單位甩手套現，甘願劈價，並開出「蝕本價」1,180萬元翻拍長沙灣一號．西九龍住宅單位。
市場吹淡風，部分樓市專家成日都話銀主盤會大幅增加。劉Sir當然要問下最直接接觸銀主盤嘅拍賣師老友。
環亞拍賣行曾傑俊話，其實銀主盤由舊年中起開始增加，由過去四、五年流通量約50至60個，到近期已經倍升到約100個。佢仲話，估計去到今年底，銀主盤流通量將增至200個，比依家再增加一倍。
劉Sir最新仲八到，有個銀主盤甚至為求盡快賣出單位，甘願開「蝕本價」吸引買家。
卓明測量師行今個月中會推出長沙灣一號．西九龍銀主盤拍賣，涉及2座高層A室，實用面積約973方呎，開價1,180萬元，呎價約12,127元，較早前曾推拍嘅開價低16%，聽講個業主喺一三年以1,380萬元購入，今次開價較單位買入價足足低咗兩球。
旺角半契樓高10%拍出
至於環亞物業尋日推拍18項物業，最終成功拍出3項；當中旺角鴻都大廈2座中層F室半契銀主盤，實用面積約318方呎，開價150萬元，經6口出價後以165萬元成交，較開價高一成。曾傑俊就話，全個物業市值約380萬元，半契市值約195萬元， 估計買家都係原業主相關人士。
工廈車位搶高兩成沽
業主盤就有銅鑼灣駱克道517號高層唐樓，實用面積約600方呎，分間咗1個兩房戶及1個開放式單位，當中開放式單位收緊月租8,900元，兩房戶就交吉，業主開價798萬元，經11口出價後以888萬元拍出，實用呎價約14,800元，較開價高逾一成一。曾傑俊估計買家買個單位將會用作投資用途。
另外，九龍灣啟福工業中心地庫一個車位，業主開價98萬元，經9口叫價後以118萬元售出，高開價兩成。另兩項有價必賣物業均無人出價最終收回。
劉Sir
App下載
