主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 3973
地產新聞
樓市出更:海壇街重建撞正降溫
(太陽) 2015年12月7日
市建局近排密密手推出項目,明日截標就有深水埗海壇街205至211A號需求主導項目,呢個係迷你版市區重建盤,市場估值約莫1.72億至2.21億元,折合每方呎樓面地價約4,500至5,760元。呢個項目貼鄰係長實地產(01113)早前投到、規模較大嘅項目,所以會有協同優勢,但對於其他發展商嚟講,由於近排新盤銷情減慢,股市又唔係太穩定,所以會影響佢哋嘅入標意欲,有測量師就估計接獲標書有機會少過10份。

海壇街205至211A號項目,地盤面積約4,553方呎,預計總樓面約38,386方呎,當中住宅樓面約34,123方呎,商業樓面就有4,263方呎,估計只能夠提供約69伙,屬於市區迷你項目。

市建局早排邀請全數合共22家有份遞交意向書嘅發展商入標,除咗大發展商長實地產、新世界(00017)、新地(00016)同南豐等,仲有萬科置業(香港)呢類中資公司等。

劉Sir睇番近呢幾年,原來市建局喺同區已經批出多個發展項目,好似明日截標嘅迷你項目,貼鄰就係舊年年尾由長實地產投得,規模比較大嘅海壇街、桂林街及北河街項目。

長實或爭 有協同效應

市場相信,若果由長實地產再下一城,相信可以帶來協同效應,但對於其他發展商嚟睇,個項目地盤細,發展難度相對較高。

前排已經有發展商講到明,細地盤開則會好辛苦,加上利潤唔多,所以入標機會唔大。

單幢樓難與毗鄰「包裝」

產業測量師張翹楚就認為,今次個項目規模唔大,只屬單幢樓,好難同毗鄰發展項目可「包裝」成大型新盤競爭,所以其他發展商入標顧慮增多。加上近期金融市場出現好多不利因素,而且最近新盤銷情都好似慢咗,中小型發展商相信承擔風險能力比較低,所以估計今次截獲標書有機會少過10份。

綜合市場睇法,呢個項目估值介乎1.72億至2.21億元,折合每方呎樓面地價約4,500至5,760元。據聞,市建局今次分紅門檻係5.6億元,即係收益過咗呢個數,首2,000萬元要分兩成畀市建局,之前每2,000萬元就分遞增,上限去到最高50%。

劉Sir