主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7613
地產新聞
樓市出更:康城8期 料不足十標
(太陽) 2015年9月29日
港鐵(00066)將軍澳日出康城第八期發展項目將會喺聽日截標,呢個項目位處臨海,補地價金額超過29.5億元,計番每方呎補價約莫2,830元,係日出康城純住宅發展項目中最高呎價嘅一期。雖然近排樓市明顯轉勢,但係市場就認為對呢個提供中型單位嘅臨海項目影響唔大,相信部分發展商或以合資形式競投,預計標書數目少於10份。

劉Sir知道,今次截標嘅日出康城第八期發展項目補地價金額約莫29.5526億元,以總樓面約莫104.4萬方呎,計番每方呎補價就大概2,830元,呎價比起項日出康城第一至六期嘅純住宅發展,大幅高出約17.2%至83.8%不等。

劉Sir仲知道,今次項目分紅比例至少15%,不設前期工程費,而發展商須額外出價畀港鐵競投,即係話分紅比例同發展商出價將會係勝負關鍵。

部分發展商或合資

劉Sir嘅老友理想城市張聖典就認為,雖然近排樓市轉咗勢,不過今次截標嘅日出康城第八期項目都有一定嘅吸引力,佢話項目臨海,加上將軍澳區發展日漸成熟,對區內項目有興趣嘅發展商亦會愈來愈多。

佢仲話,將來私宅供應會增加,但係出現過度供應問題嘅相信係劏房式細單位,所以對於日出康城第八期嘅影響會比較小。

另外,佢就估計部分發展商或會以合資形式競投,而標書數目料少於10份。

限伙數 料建中型戶

事實上,日出康城第八期發展項目好難提供劏房式細單位,因為伙數限制咗喺約1,168至1,430伙之間,除返開係平均每伙面積約730至894方呎嘅中型單位。

呢個項目早排招收意向嘅反應唔錯,共收到21份意向書,入標財團除咗區內有項目嘅長實地產(01113)、新地(00016)及會德豐地產等主要發展商外,保利置業(00119)、萬科置業(香港)同中國海外(00688)等內房企都參與競投。

劉Sir