市區重建局筲箕灣西灣河街項目，同埋屯門青山公路住宅地將喺今個禮拜截標，聽日率先截標嘅西灣河街重建項目，喺七月就收到史上最多嘅38份意向書，仲全數獲邀入標。測量師老友就覺得呢個市區項目難求，投資額又比較少，相信會有踴躍嘅競投反應，上限估值約莫6.42億元。至於禮拜五截標嘅屯門青山公路住宅地，市場嘅估值就頗有分歧，由約4.81億去到9.74億元。
劉Sir老友理想城市張聖典就咁睇，佢話呢個西灣河街重建項目係市區嘅罕有供應，以目前市況嚟講，分紅項目會比起純取決地價嘅項目吃香，再加上項目所牽涉嘅投資額比較小，相信都會有相當嘅競投反應，佢估計每方呎樓面地價大約10,000元。屈指一算項目估值約莫6.42億元，係市場嘅上限價。
劉Sir知道，當呢個西灣河街項目將來銷售收益達12.7億元，即係每方呎約莫19,796元，中標嘅財團就要向市建局按比例分紅，而達標後首次收益達3,000萬元就要分紅20%，其後再按比例增加至最多50%。
38財團全獲邀競投
而市建局全數邀請38家有遞交意向書嘅財團入標，當中包括長實地產（01113）、新地（00016）及萬科置業（香港）等發展商。
呢個項目佔地約7,643方呎，總樓面約64,155方呎，市場依家最低估值約5.77億元，即係每方呎樓面地價約9,000元。
屯門地估價分歧大
至於緊接喺禮拜五截標嘅屯門第48區青山公路－青山灣段住宅地，地皮面積約8.82萬方呎，總樓面大約11.46萬方呎。測量師對呢幅地皮估值分歧頗大，差幅超過一倍咁多。
張聖典話，呢個屯門項目可以興建1幢6層高向海中低密度住宅，部分作洋房發展，預期每方呎樓面地價約8,500元，計番估值約9.74億元，係市場上限價。
但係老友高緯環球張翹楚就覺得，地皮嘅地勢較低，對比早排批出嘅掃管笏地皮位置上亦較偏遠，佢就預計每方呎樓面地價約4,200元，係市場下限估值，計番地價約莫4.81億元。
劉Sir
App下載
