主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6703
地產新聞
樓市出更:豪宅蟹貨 排隊翻身
(太陽) 2015年8月17日
今年樓價繼續以理想幅度上升,部分早幾年買入嘅蟹貨,終於都可以返到家鄉。劉Sir睇番今年啲成交紀錄,好似上年頭七個月成交宗數蝕讓比例高達64%同54%嘅何文田半山壹號同西南九龍瓏璽,今年到依家蝕讓比例減到得番33%同29%,個別業主帳面仲可以賺四成走人,雖然近期外圍經濟有啲波動,但相信豪宅樓價都撐得住,估計會愈嚟愈多業主可以甩身。

上年頭七個月,半山壹號有22宗成交,佔14宗或約64%帳面要蝕讓,但今年情況就好唔同,今年頭七個月約莫錄21宗買賣登記,當中有7宗帳面要蝕入肉,佔比例只係33%,其實當中有唔少帳面只係蝕少少,好似有個半山徑15號中層戶,一○年買入價係2,430萬元,今年以2,400萬元賣出,蝕咗約1.2%。

而另一個業主喺○八年以約2,087萬元買入一個半山徑28號中層戶,今年以2,080萬元賣咗,帳面都只係蝕幾萬。有個半山徑12號低層戶,○九年買入價1,289萬元,依家賣咗1,865萬元,賺幅更接近45%。

比墅買賣半數損手

另一個翻身盤係瓏璽,上年頭七個月蝕讓宗數比例高近54%,但今年到依家14宗買賣登記,只得4宗帳面要蝕讓,蝕幅跌到得番29%,每宗帳面蝕約20幾萬到近60萬元。

而有部分單位賺幅仲唔錯,好似有個3座中層C室,一一年買入價逾1,325萬元,今年以1,583萬元賣出,升值近20%。

至於大埔比華利山別墅,上年頭七個月錄到8宗買賣登記,但當中只得1宗帳面有錢賺,蝕讓比例高近88%,到今年就有明顯進步,到依家同期已經有11宗二手買賣登記,當中6宗蝕讓,蝕讓比例大幅下降到約55%。

名家匯仍全數見血

不過,仲有一啲盤仍然未返到家鄉,近幾年開售嘅沙田名家匯,今年首七個月錄到兩宗買賣登記,全部見血,同舊年同期一樣,出現百分百蝕讓。其中有個2座A單位,一二年以2,400萬元買入,揸咗約莫三年以1,980萬元賣出,帳面唔見約420萬元,蝕幅約17.5%,至於另一個1座單位,業主揸咗四年帳面蝕11.3%。

劉Sir