近幾年政府不斷主動推出土地，發展商將增加土儲嘅焦點轉咗去賣地，收購舊樓重建嘅意欲愈嚟愈低，今年上半年申請強拍個案只係得5宗，比舊年同期跌咗差唔多40%，申請項目嘅市場估值總共都係得24億左右，比舊年同期超過34億元，跌咗約莫三成；有測量師老友同劉Sir講，預計今年成年強拍申請會只係得10宗左右，將較去年大減逾50%。
劉Sir知道，今年上半年入稟土地審裁處嘅舊樓強拍申請得5宗，較舊年同期8宗，跌咗約莫37.5%，仲創咗一○年放寬舊樓強拍申請門檻後嘅新低。
恒地最積極佔兩宗
如果以申請宗數嚟睇，恒地（00012）最積極申請強拍，佔咗2宗，分別係深水埗南昌街210至212號，同埋香港仔田灣街12至14號，兩個都係屬於中小型項目，涉及嘅樓面總共只有5.6萬方呎，總共估值只係大約1.58億元。
若果以金額計，上半年5宗強拍申請，總市值約莫係24億元，較舊年上半年嘅34.68億元，跌咗大約30%。
劉Sir仲知道，當中規模最大嘅係年初有財團就灣仔晏頓街、蘭杜街及皇后大道東的寶華大廈多個地段向土地審裁處入稟申請強拍，涉及地盤面積達1.2萬方呎，可建樓面約11.5萬方呎，物業依家估值大約14.72億元，市場估計進行收購嘅發展商好大機會係太古地產（01972）。
發展商寧投政府地
對於今年強拍申請宗數比舊年大減，第一太平戴維斯估值及專業顧問服務董事總經理陳超國認為，主要係因為政府積極推地，發展商通常捨難取易，傾向落標競投政府土地，佢仲預計，今年全年大約得10宗強拍申請，比舊年少咗一半以上。
陳超國仲話，觀塘道53至55A號啟德大廈已完成咗聆訊程序，年內可獲批強拍，有望成為歷來最大規模強拍項目。劉Sir知道， 啟德大廈呢個項目喺一三年已經申請強拍，涉及4幢7層高嘅舊樓，地盤面積約6.15萬方呎。
劉Sir
App下載
