主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8717
地產新聞
樓市出更:康城七期僅接7標
(太陽) 2015年6月3日
一鐵一局昨日同時有項目截標,港鐵(00066)嘅將軍澳日出康城第七期,就有7份標書,標書數目比舊年同樣連同商場招標嘅大圍站上蓋項目少2份,相信同今次分紅條款較辣有關,而個別發展商就表明只揀「B餐」,即係獨資入標住宅部分。至於市建局大角咀晏架街/福全街首個酒店項目,亦收到10份標書。

日出康城第七期可發展住宅樓面約75.6萬方呎,提供單位唔超過1,250伙,另有約47.9萬方呎商場樓面。劉Sir聽到消息講,若果發展商一併競投商場部分,分紅比例固定為10%,扣除約14.4億元地價後,賣樓回本65%起開始分紅,入場費就由發展商決定。

領匯永泰合夥競投

呢個項目係繼大圍站上蓋項目後,再次設「A、B餐」比發展商選擇,今次收到7份標書,涉及最少9家發展商,但未見到有內地房企,其中遠展(00035)同會德豐地產就會獨資入標競投「B餐」住宅部分。

遠展地產部總經理朱寶林話,唔競投埋商場部分,係因為「B餐」較吸引,預計總投資額110億元,料興建中小型單位。今次亦係集團第一次獨資入標康城項目。會德豐地產高級經理何偉錦同係話,「B餐」方案相對較簡單,最終放棄商場部分。

而入標嘅大型發展商仲有長地(01113)、新地(00016)及恒地(00012),後兩者話獨資入標。至於領匯(00823)今次就拍住永泰地產(00369)合組財團入標。高緯環球大中華區評值諮詢部董事張翹楚相信,部分發展商兩方案都有入。

大角咀酒店收10標

而於市建局大角咀晏架街/福全街酒店項目就收到10份標書,泛海酒店(00292)同新加坡鴻福集團獨資入標,其餘包括新地、帝盛酒店(02266)、華大地產(00201)等,而百利保(00617)就同富豪酒店(00078)合組財團。

帝盛酒店項目總監余浩宏話,呢個項目料發展3至4星級酒店,提供100至200方呎嘅房間,估計房價約500至600元。

華大地產酒店部總經理吳志忠話,項目料發展成4星級酒店,提供約300間房,唔擔心內地訪港旅客減少。

劉Sir