主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6558
地產新聞
劏房亂象禁不絕 無殼蝸牛有誰憐
(東方) 2015年5月2日
港府查封違規工廈劏房出師不利,一批受影響住戶連日來示威抗議,甚至通宵留守屋宇署辦事處,仲揚言要堅持到下周一,令本來已經浮躁不安嘅社會增添幾分戾氣。房屋問題持續惡化,民怨不斷升溫,當局再唔諗辦法拆除呢個計時炸彈,遲早爆大鑊咋。

件事係咁嘅,荃灣榮豐工業大廈涉嫌違規改建成劏房而被屋宇署查封,居民指摘當局事前冇知會,令佢哋頓失居所,加上不滿被安排入住距離遙遠嘅屯門臨時收容中心,難以負擔昂貴嘅交通費,要求當面向屋宇署署長陳情,如果署方唔回應,唔排除將行動升級咁話。

即係咁,違規劏房亂象叢生,唔單止環境擠迫,衞生欠佳,而且存在安全隱患,仲慘過第三世界國家,的確需要整頓。好似榮豐工廈劏房咁吖,隔籬就係化學品倉庫,萬一發生意外,後果不堪設想o架。所以話,當局查封違規劏房係無可厚非嘅,問題係,如果溝通不足,安排失當,引發官民衝突,咁就隨時弄巧反成拙喇。正所謂,有頭髮冇人想做瘌痢,居民被迫住喺違規劏房,係無可奈何嘅選擇,當局一聲查封就搞到佢哋無家可歸,都咪話唔徬徨。

係人都知,今時今日房屋供應短缺,導致劏房遍地開花,榮豐工廈劏房不過係冰山一角咋。嗱,貨櫃劏房、雞欄劏房、豬欄劏房、教堂劏房、廁所劏房,連天橋底都唔放過,簡直係五花八門,千奇百怪,證明房屋問題有幾咁嚴重。咪以為劏房租金平吖,如果按呎計,分分鐘高過半山豪宅,而且仲要爭崩頭添,你話係咪誇張吖!

俗語話,有需求就有市場,違規劏房禁之不絕,皆因房屋供應長期不足,好多無殼蝸牛唔住劏房,就只能瞓街,根本冇得選擇。其實,港府正正係工廈劏房嘅始作俑者,早幾年港產官僚曾主動提出「容許工廈改建為過渡性小型住宅」,希望紓緩房屋供應壓力喎。點知噏完就算,拖拖吓冇咗件事,業主固然無所適從,劏房居民更只能望天打卦。事實證明,信佢一成,雙目失明,港產官僚真係靠唔住o架。

講嚟講去,房屋問題搞成咁,都係前朝貪曾政府無所作為種下嘅禍根,現屆政府話就話要撥亂反正,將房屋問題作為施政重中之重,可惜巧婦難為無米之炊,喺重重阻力之下,覓地起樓寸步難行,重中之重變成痛中之痛。正如杜甫話齋,「安得廣廈千萬間,大庇天下寒士俱歡顏。」古人為居住問題傷腦筋,今日港人一樣咁煩,簡直可悲!