主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8138
地產新聞
樓市出更:西貢地細引財團出手
(太陽) 2015年4月20日
政府維持穩定嘅推地步伐,嚟緊今個禮拜五就輪到西貢對面海康健路住宅地截標,呢幅地皮可作低密度住宅發展,而且所牽涉嘅投資額唔大。劉Sir覺得喺西貢有發展項目嘅信置(00083)同新世界(00017)都有機會入標,亦會吸引部分中小型財團出手,地皮市場最高估值約莫4.13億元,計番每方呎樓面地價大約8,000元。

劉Sir知道,今次截標嘅西貢對面海康健路住宅地,佔地大約36,857方呎,可建樓面約莫51,593方呎,而據地契嘅規定,建築物嘅高限為5層,亦沒有限量條款規限發展。

樓面呎價料達八千

近排唔少規模比較細嘅地皮都有唔錯競投反應,相信呢幅西貢住宅地亦會有返咁上下參與度。

劉Sir老友理想城市張聖典就覺得,今次嘅入場門檻唔高,地皮位置唔錯仲有海景,具有潛力打造豪宅,對將來嘅價格有一定保證,預計每方呎樓面地價約莫8,000元左右。計番估值即係大約4.13億元,係市場估值嘅上限價。

老友高緯環球張翹楚都覺得,項目始終係細價地皮,相信競投反應唔差得去邊,估計每方呎樓面地價約7,800元,折合估值約4.02億元。

劉Sir都知,政府近年都批咗唔少西貢地皮。最近一幅就係舊年三月批出嘅碧沙路與清水灣道交界洋房地,成交價1.6億元,每方呎樓面地價大約19,935元,係新界區政府賣地呎價歷來次高。

其實全個新界區最高呎價嘅土地都係由西貢地保持,西貢銀線灣碧沙路洋房地皮一一年以7億元批出,每方呎樓面地價約21,349元。

信置密掃同區地皮

西貢除咗洋房低密度發展地皮之外,喺前年,區內都有兩幅限量住宅地批出,包括當年十一月期間,以8.5億元批出嘅西貢篤康村路限量地,同埋一月份售出嘅西貢沙角尾限量地,成交價14.55億元,呢兩幅地皮都係由信置投得。

劉Sir