地產博客 > 敢說亮話 返回
瀏覽人次:27006    回應:26
敢說亮話
三文魚與小棠菜
 
湯文亮博士
紀惠集團行政總裁
2015年12月24日

  有口痕友同我講,我的題目搞錯,應該是楊乃武與小白菜,我費事同佢講,因為佢根本唔知道三文魚與小棠菜有什麼關連,近日,我睇報章食經,那些資深食評人又再講日本人不食三文魚刺身,香港人對此趨之若鶩,彷彿說香港人是未進化的人,我唔明白那些食評人寫了咁多年食經,到現在都唔知道點解日本人唔食三文魚,有食評人講,三文魚有蟲,其實,大多數動物都有蟲,就算人類都唔能夠例外,唔通唔食。

  有人話北歐三文魚與日本的不同,日本的三文魚叫鮭,是淡水魚,有寄生蟲的機會比生長在北歐海裡的大一些,但這不是日本人不食三文魚的原因,主要因為三文魚就算腐壞,仍然可以保持原有顏色,所以,日本人不敢食。昨晚,我和陸叔到了我們其中一個剛獲得米芝蓮星的日本餐廳租客試菜,順便向日本主廚求證,他同意我的見解,不過,他亦指出,江浙人士亦不食小棠菜,只是用來擺設,因為小棠菜煮幾耐都唔會變色,依然是碧綠,所以,日本人不食鮭魚刺身,與江浙人士不食小棠菜的道理是一樣,因為唔知道食物是否經已經腐壞,我又想唔到,日本佬連小棠菜都知道。

  陸叔問我,點解今晚的日本菜如此有水準,很簡單,晚飯前我先恭喜日本餐廳剛取得米芝蓮星,同時叫老闆放心,續租不加租,日本人放下心頭大石,料理自不然有水準,人之常情而已。陸叔再問,我有冇折扣,我話我不是國內人士,不喜歡什麼都打折,只要服務,出品夠水準,打折根本不重要。

 

 
 
我要回應
我的稱呼
回應 / 意見
驗証文字