地產博客 > 敢說亮話 返回
瀏覽人次:37612    回應:19
敢說亮話
現在買樓是最冇膽的人
 
湯文亮博士
紀惠集團行政總裁
2015年8月6日

  有前輩問我有冇膽,我話膽生毛,前輩唔同意,因為現在有咁多人以創新高價買樓,都唔見我買,點樣可以話膽生毛,前輩咁講我絕對同意,就算話我冇膽我都承認,我的確現在冇膽買二手細價樓,用創新高價買就更加唔會,但我又唔同意現在買二手細價樓的人很大膽,嚴格來說,他們是最冇膽的人,在過去幾年,有咁多好機會都唔買樓,到現在才買,如果有膽量,早幾年就已經買咗樓,不過,就一定有人不同意,他們認為在過去幾年,經濟未明朗,而大多數評論員都預測樓市有下行風險,所以,暫時未買樓亦是非常正常,唔可以話當時冇買樓,而現在買樓的人冇膽,這點我同意,但亦有補充。

  現在經濟雖然比較明朗,但亦只是當時經濟學家所擔心的事,逐漸浮現出來,利息在經過7年低息期之後,將會向上調整,供應量唔使我多講,否則,地產商都不會以同區二手樓買樓,我講的是細價樓,中型單位以及豪宅,依然有兩成以上溢價,從DSC執笠,新報結業事件,大家亦睇到經濟轉壞,雖然有人認為今日買樓的人很有膽量,但我認為他們只是慷慨,正所謂慷慨赴死易,從容就義難,昔日大環境可以從容買樓就推三推四,今日就有如此膽量,其實,勝負早已出現,如果昔日買樓的人都變成輸家,今日買樓的人會怎樣,我又唔敢想。

  有人話剛剛儲夠錢上車,如果是這樣的話,我只能嘆一句時不與那些人,既然如此,何不再等一會,待市況比較明朗才作決定,如果市況轉壞,樓價一定會下跌,到時才考慮仍未遲,這亦是物業投資者三字訣「等,忍,狠」中之忍,夠錢買樓而唔買就要忍,唔夠錢就要等,至於狠,一定要夠膽才可以,當日,有能力而沒有買樓的人,他們只能怪自己當時唔夠狠,千祈唔好賴那些經濟學家,他們大多數都是租樓住,點會鼓勵其他人買樓。

 
 
我要回應