地產博客 > 文亮語 返回
瀏覽人次:24837    回應:9
文亮語
如何令新印花稅更為有效
 
湯文亮博士
紀惠集團行政總裁
2016年11月13日

  有老友話我明目張膽,話剛推出的新印花稅在兩年內必定取消,根據政府以往做法,印花稅只會愈來愈加重,絕對不會放寬,佢問我點解咁肯定,其實我也不太肯定,不過,如果政府希望新印花稅發揮預期作用,就一定要訂出一個取消日期,兩年已經是極限,但亦是一個可以接受的期限,老友話唔明白。

  我這個老友天資聰穎,有兩博士學位,如果佢唔明白,我相信大部分財金官員都唔會明白,首先,我們要了解政府點解要推出各項印花稅,根據CY講,是打擊炒賣需求,外來需求,投資需求,目的是希望初次置業者可以上車,但在政府推出新印花稅之後,市場反應極度不符合政府要求,價跌量跌,打算上車的人都縮窒,唔敢上車,他們除了見市況氣氛轉壞,成交量降低而不敢上車之外,同時希望在新印花稅之下,有物業的人不打算入市,地產商要出貨或者私人業主要賣樓,必定要減價或者加大優惠,已經立刻有地產商願意替買家繳付15%新印花稅,所以,他們採取「等」字訣,遲遲唔願意入市,政府出招希望初次置業者上車的心機就白費了。

  政府能夠訂出一個期限,假設在兩年之後,一切回復正常,不但取消新印花稅,甚至連雙印花稅也取消,有了這個期限,已經有物業的人不會介意多等兩年而少付超過10%印花稅,這方面的需求一定大減,而初次置業者亦知道他們只得兩年時間,在這兩年內必定會積極上車,有一個期限,新印花稅才可以發揮預期作用,而我估計,政府在供應達標情況下,可能會在兩年內取消新印花稅,但就不會預先公布,所以,我夠膽話新辣招會在兩年內被取消,希望初次置業者留意,否則,有可能錯失良機。

 
 
我要回應
我的稱呼
回應 / 意見