地產博客 > 文亮言 返回
瀏覽人次:35796    回應:11
文亮言
利息其實是很貴
 
湯文亮博士
紀惠集團行政總裁
2016年2月15日

  市場上每一個人講利息都是很平,存款接近零不在話下,借錢亦只不過是2%多少少,唔借就笨,於是,很多人借錢買樓,買股票,買金融產品,買人民幣,到最後全部都輸錢,他們才發覺利息原來是絕對不便宜,但又有幾多人可以抵擋得到低息的誘惑,市場上,輸錢是正常的,只不過是多與少的分別。

  低息真的很難界定是正或邪,如果沒有低息,在金融海嘯後就很難有翻身機會,但低息持續,令人不忿持有現金,結果是將資產價格抬高,大家稱之為泡沫,而大家亦將泡沫注意力集中在物業,其實,什麼也有泡沫,投資什麼也不能避免,如果買物業沒有借錢,那些人會覺得物業的泡沫比其他投資產品少得多,不過,大多數人買物業都要問銀行借錢,若果借一半,物業價格下跌兩成,他的投資就唔見咗四成,如果好似幾年前可以借七成,下跌兩成,投資就唔見咗三分二,咪話唔驚心動魄。

  如果利息在高位,就算銀行肯借七成,一般人都唔會借咁多,亦有不少人情願做定期存款收息,現在,定期利息連雞碎咁多都冇,唔買樓唯有買股票,買金融產品,到後來才發覺,就算是零息,依然都是最佳投資,試問又有幾多人可以存款唔收息,總之,今次全球資產大貶值,揸現金的人當然可以稱王,但我估計數目不會很多,買物業或者任何資產而沒有借錢已經可以稱得上是贏家,資產價格下跌兩三成就當作過去幾年利息,由此可見,利息其實是很貴。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. 打工仔 Andy 2016-02-15 09:39:45
如果用加按或賣樓既錢去炒股, 贏錢就利息平, 輸錢就真係利息好貴了!
哈哈哈!
2. 凝風 2016-02-15 10:43:44
借親錢要俾息,俾1蚊都係貴....(心理上係咁)

其實而家股市PE市值咁平,值得用閒錢買D儲下錢。(唔係叫人賣樓換股,唔好搞錯)
有恆心既人,選隻藍籌股,個個月買1-2手,平均成本法連續買2年應該有唔錯回報(我對短線炒賣無興趣)。

純粹個人意見,自行評估風險~
3. 安多安多 2016-02-15 11:20:22
現金為王, 但咩都唔買, 就跑輸通脹
甘其實係咪都全輸? 
4. 蕭峰 2016-02-15 12:09:00
依家係通縮時期。


5. 凝風 2016-02-15 14:51:01
現在時勢,短線沒人嬴。(除非神級投資者)

"現金為王, 但咩都唔買, 就跑輸通脹。甘其實係咪都全輸? "

又唔係咁講,唔同時期,各樣都有唔同抗跌能力。
只是現金是目前最好抗跌的東西。

大家放眼中長線的,每樣都不同看法。
6. LYC 2016-02-15 15:12:39
魚蛋革命加速股市見底,我覺得萬八點已經見了今年底。隨住股市見底,樓價亦已企穩,因為劈價賣樓啲人多數係炒燶股票,被迫賣樓。
7. 毛毛 2016-02-15 15:34:10

忍唔住一問: 請問各位 知唔知"LYC"兄係地代還是樓市大好友?

因我見佢個個post回覆都好公式化地唱好樓市

8. 神祈小子 2016-02-15 15:38:33
有朋友2012年俾一成首期買了層,上年6月賣出,持貨3年樓價回報五成多,如果只計他成本(一成首期),已有5倍的回報,這是樓價上升的威力,但如遇著樓價下跌,就真是嚇餐死,投資真要量力而為。

 


9. 回毛毛 2016-02-15 16:45:58

本人得,觀乎LYC所回應的內容質素和口吻,似地代多些

10. 無言 2016-02-15 17:57:55
十八個月後買樓,好過現在買。但不需要賣樓人仕,就唔好貪赚價位賣出。個人意見。
11. 詸途小書僮 2016-02-18 12:46:15
"若果借一半,物業價格下跌兩成,他的投資就唔見咗四成,如果好似幾年前可以借七成,下跌兩成,投資就唔見咗三分二"
請問如何計算相關損失?