唔識唱校歌的校友

　　今日下午回浸會大學參加60週年校慶記者招待會，香港有很多傳媒人都是從浸大傳理系畢業，記者會當然搞得有聲有色，新校長錢大康61歲，非常之潮，窄腳褲西裝，冇打呔，有傳媒人風範，唔怪得在記者會前酒會，我見到差不多所有副校長都冇打呔，錢校長致詞時表示，60歲在大學來說是非常年輕，現在年資最大大學超過1,100歲，英國牛津排第三，亦超過900歲，錢校長仲表示，做大學生最緊要有創意，好彩冇講我的「細價樓爆煲論」，如果浸大學生學我咁有創意，亂咁發表，咁就慘了。

　　在記者會中有播放畢業學生唱校歌的短片，我有份參與，不過我唔識唱校歌，我讀浸大時的校歌不是現在的，當時導演話唔緊要，佢會搞定，今日出街，我又好似識唱，今次校慶主題，我們都是浸大的，從這個主題使我想起在2009年初，不少測量師行，評論員，經濟學家排隊講樓市，結果只得一個，就是樓價會大跌，剛巧有一本雜誌搵我寫地產評論文章，編輯睇到我第一篇稿就問點解我對地產見解與其他人不同，那些專業人士話跌，我竟然話升，係咪倒拗。我說，有些測量師，來港都未夠三個月，東南西北都未分得清楚，點樣評論樓市，那些經濟學家仲要租樓住，又點識得評論，當時，我在地產行業已經三十年，是在地產行業浸大的，當然比他們了解，2009年底，樓價大升，政府開始出招壓樓市，叫九招十二式，我相信冇人會記得。

　　錢校長會在下個月到我在明報的會客室，我會準備一些刁鑽教育問題，我相信對於錢校長來說，如食蛋糕一件，因為錢校長是在教育學術的環境裏浸大的。