香港地少人多，寸土尺金，呢樣係人都知，但奇怪嘅係，港府呢頭呻土地資源缺乏，發展無地可用，嗰頭坐視大量官地被佔用，簡直匪夷所思。
呢，新界大棠荔枝山莊有個開咗十年嘅野戰場，三年前被傳媒踢爆，亦多次畀地政總署證實涉及佔用官地，奇就奇在，地政總署明知官地被霸卻遲遲唔執法，而城規會就一於開綠燈放行，批准經營野戰場地。直到今年一月，城規會指場地因違反批准附帶條件，撤銷許可。照計，呢單霸官地事件應該就此了結喇，點不知根本唔係呢回事，早排記者以顧客身份查詢，職員即時介紹有叢林戰玩，仲可以提供帳篷過夜同燒烤服務添，連澳門嘅大學生都嚟幫襯，生意不知幾火爆。
記者翻查過地政總署圖則，呢個野戰場除咗約一千五百平方米嘅辦公室屬於私人土地外，周圍過萬平方米「戰場」都係官地，簡直係蛇吞象。按照政府規劃用途，野戰場位置屬於「綠化地帶」同「康樂地帶」，用嚟做野戰場地要獲得城規會許可，而申請人續約時亦已經話明場地涉及官地，城規會竟然照批可也，簡直助紂為虐。
你話嘞，地政總署扮盲，城規會就扮黃大仙，霸官地易過借火，唔霸咪好蝕底？幾大唔執輸喇！事實上，有人根本當法例透明，一邊話野戰場地五月已經停止運作，一邊繼續暗中經營，做包場生意。關注團體負責人直言對當局嘅做法感到「奇怪」，警告事件顯示現行規劃制度未有關注業權問題，可能會縱容其他市民「霸山頭」，事後至向城規會提出改變規劃。
嗱，關注團體絕非杞人憂天。野戰場位置私人地業主持有嘅另一幅地，有關申請範圍同樣包括官地。佢仲好爽口咁話，私家地同官地位置混淆，難有清晰界線。咁即係點？即係官私不分，霸得就霸，佔得就佔咯。可想而知，鄉郊地區霸佔官地唔係個案，其實相當普遍，甚至可以講係無王管，班港產官僚根本就係得過且過Hea住做。
查實審計署多年前曾發表報告，炮轟地政總署執法不力，坐視大量官地被霸佔。可惜官老爺批評接受，態度照舊，搞到霸官地問題未有紓緩，反而不斷惡化添，每年竟然達到八千幾宗，唔少個案拖延超過十年都未解決。政府拓土建屋寸步難行，成日呻「地從何來」，其實只要將被霸嘅官地收番發展，咪可以解決唔少房屋問題囉。
講起都勞氣，官地唔係造福市民，反而變成違規者嘅生財工具，問你服未。計功夫茶話齋，靠呢班庸官把關，香港官地遲早變晒「私地」嘅咋。
App下載
