近排樓價插晒水依然交投冰封，連絲絲行過地產代理行都感受到寒意。
話說有日行過代理行，發覺啲賣樓標語變晒樣。之前市道好時嗰啲「一閃即逝」固然已經逝去咗，不過連平時見開嘅「四房望海」、「家庭最啱」、「還價即成」都變晒做「不要炒魷」、「嫁入豪門」、「老公聽話」！何止係新年願望，直頭絕對反映代理心中所想。
近呢幾個月，二手價閒閒哋跌過百萬已經唔罕見，但都仲係唔覺有人爭買，有開咗十幾年嘅細行話已經四、五個月冇開個買賣單，話呢行「沒有明天」。連業界人士都預計，農曆新年之後會有500至600間地產代理要摺埋。
變成「不要炒魷」「嫁入豪門」
咁嘅時勢，有邊個唔諗住「不要炒魷」，最好就係「嫁入豪門」，入咗門就梗係想「老公聽話」。睇見咁絕望，絲絲行過都差啲停低祈禱。
但最終敵唔過寒意，走快兩步過咗港島區，點知見到吉舖街招個代理名叫「方開單」！佢阿爸係咪咁有先見之明幫佢改個咁嘅名就唔知，不過佢好想開單就係人都知囉。嗰一刻，絲絲好想打電話去慰問吓佢開到單未。
余絲韻
App下載
