主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6368
地產新聞
樓市出更:新盤標售今年勢倍增
(太陽) 2015年10月20日
近排唔少發展商,都鍾意招標賣樓,當中仲有唔少係超級豪宅。中原統計咗一三年至今年九月有144伙一手單位透過招標發售,成功售出率達61%;單計今年到九月,一手樓招標量已超過90宗,預計全年招標量有110宗,按年增加超過一倍。

劉Sir知道,一手樓尤其係洋房或者分層豪宅,好似太古(00019)分層豪宅傲璇,同埋信置(00083)大嶼山洋房Botanica Bay咁,發展商都選擇以招標形式賣樓。

中原尋日公布一份統計數據,話一三年到今年九月期間推出嘅144伙招標出售嘅新盤,成功售出率有61%,就算招標唔成,出價單補飛亦都可以賣到18%,真係流標收回只佔21%。

招標新盤亦都唔係洋房佔大多數,反而係分層住宅佔62伙或43%,洋房同複式分別有35伙同34伙,分別佔大概24%;而每宗成交金額都係以5,000萬以下為主,佔43宗,其次就係4億至5億,佔9宗。至於一手招標物業地區分布,以九龍西佔57%最多,其次為新界東佔33%。
出價反映實質承受力

單計今年頭九個月,新盤招標量有超過90伙,估計全年有機會達110伙,按年增加一倍。

中原測量師行張競達同劉Sir講,招標成功售出率有61%算係好高,又話喺依家市況呆滯下,由買家出價反而反映到市場承受能力,對市場有好處;又話招標賣樓唔係新鮮事,發展商經過兩年適應一手新例,冇需要以招標避過當局規管。

山頂南區買賣跌17.1%

至於不時有單位招標嘅山頂同南區,中原何兆棠就話,第三季區內共錄29宗二手成交,按季跌17.1%,另外因為有發展商拆售收租盤,亦錄28宗一手成交。

佢預計,區內分層交吉盤稀少,第四季價錢會高位徘徊,小型洋房項目有5至8%樓價上落,但係5,000萬元以下分層及部分大型洋房屋苑,因買家實力相對稍遜,故樓價有下調壓力,估計分層減幅10至15%,洋房亦有相若議幅。租務方面,因業主挽留舊客,續租個案增加,但10萬元以上物業租金預計會下跌逾10%。

劉Sir