主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6701
地產新聞
樓市出更:康城8期趕絕蚊型樓
(太陽) 2015年8月21日
港鐵(00066)配合政府加快土地供應,今日起推出將軍澳日出康城第八期招收發展意向書,計埋項目提供嘅1,430個單位,今季初至今已經推出咗5,360個單位,佔咗今季政府推地目標嘅87.9%,同埋劉Sir知道項目位置臨海,兼且有伙數上限,相信會興建中大型單位為主。

有測量師老友估計項目每方呎補價約莫2,700元,勢成日出康城咁多期嘅純住宅發展新高,計返補價金額就大約28.19億元。

新地有意競投項目

港鐵公布,上述日出康城第八期將於今日招收發展意向書,截收日期係本月二十六日,即係下個禮拜三,而項目佔地約莫17.9萬方呎,總樓面最多大約104.4萬方呎,將會提供3幢住宅樓宇,單位數目唔可以多過1,430伙,預計項目會喺二○二一年落成。其中喺區內有項目嘅新地(00016),集團副董事總經理雷霆透露會研究競投。

臨海近鐵路佔優勢

劉Sir屈指一算,今季政府計劃推出嘅地皮都推出得七七八八,得返青衣細山路一幅住宅地仲未有消息,即係唔計細山路預計提供嘅740伙,今季仲有一個多月先完結,已經推出咗大約5,360個單位,佔咗供應目標約87.9%,進度都相當理想。

至於今次推出嘅日出康城第八期,位置係最臨海嘅一期,而且靠近鐵路站,劉Sir班老友都幾睇好口價。

好似理想城市張聖典就咁睇,項目臨海,而且又近鐵路站,相信可以吸引到唔少發展商競投,佢估計每方呎補地價約2,700元。

劉Sir發現,如果項目每方呎補地價真係2,700元嘅話,就會成為日出康城呎價最高嘅純住宅發展,而計返補價金額總數就約莫28.19億元,係市場嘅上限價。

而之前批出各個期數,唔計有商場元素嘅第七期,其餘第一至六期嘅純住宅發展,每方呎補地價金額介乎約1,540至2,415元不等。

不過,呢個項目就好難興建到依家需求爆燈嘅中小型單位,張聖典話,因為今次項目設有伙數上限,計返平均面積大約700多方呎,所以都好難起晒中小型單位,相信會以換樓客為目標,提供中大型單位為主。

劉Sir