主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 9764
地產新聞
樓市出更:美麗臺密密掃等強拍
(太陽) 2015年6月10日
自從有咗辣招稅之後,舊樓收購就愈嚟愈難,唔少發展商都寧願積極啲去買政府或者兩鐵一局嘅地皮。不過,講到傳統豪宅區嘅靚地,就難免要花多啲心機向舊樓小業主埋手,好似恒地(00012)拍住新世界(00017)等合作嘅西半山西摩道美麗臺項目,雖然舊年已經收購超過八成業權申請緊強拍,但係發展商依然無手軟,單係今年就再收購約7伙,涉及約2.85億元。

美麗臺舊年年底由發展商申請強拍,以當時市值計,初步估值超過29.95億元,估計係歷來最大宗強拍個案,發展商今年仍然繼續密密手收購,新近就買入一個中層C室連車位,成交價4,168萬元。

重建後總樓面47萬呎

根據地產代理網上資料,個單位實用面積約1,218方呎,實用呎價約3.42萬元。

其實,喺今年到依家,呢個項目已經錄到約7宗買賣登記,當中包括3個C室、2個M室,同埋G、K室各1個,每個成交價介乎約3,250萬至4,569萬元,加埋約莫2.85億元。

美麗臺成個項目佔地近5.2萬方呎,依家由5幢14層高住宅組成,項目喺一九六三年落成,劉Sir舊年喺土審處文件睇到,當時申請人持有項目逾84.6%業權,當時物業初步估值逾29.95億元。

若果以地積比率九倍計,重建後總樓面47萬方呎,係區內難得大型重建項目。

另外,近期豪宅交投唔錯。利嘉閣鄭運同劉Sir講,西南九龍瓏璽天海鑽低層C室,實用面積885方呎,最近以1,500萬元賣出,實用呎價約1.69萬元,單位近四年升值約19%。

南灣御苑2438萬出貨

聽市場講,南區南灣御苑1座中層C室,實用面積約1,370方呎,以2,438萬元售出,實用呎價約1.78萬元。

中原蔡亞當話,港島半山金鑾閣中層C室,實用面積約971方呎,售約1,800萬元,實用呎價約1.85萬元;同區慧景臺A座中低層1室都以約1,470萬元賣出。

該行蕭家權話,西半山今個月到依家,已經有約20宗成交,其中寧養台A座低層C室以2,363萬元售出。

劉Sir