地產博客 > 敢說亮話 返回
瀏覽人次:20453    回應:0
敢說亮話
開角球時候是可以換人
 
湯文亮博士
紀惠集團行政總裁
2016年9月18日

  昨晚,灣仔甲組隊進行今季第二場比賽,結果與官塘打成0比0,對方門將救了幾個必入球,我亦有拍掌,有球員fans話唔抵,我話冇唔抵,門將救得好,同球員射得好都是比賽一部份,不過,我們打得咁好都贏唔到就的確有些少唔抵,打了兩場比賽,暫時有4分,希望在第一循環搶到16分,下半季就比較容易踢,因為落後的球隊,一定會加添球員,增強實力,希望唔需要降班。   

  昨日凌晨,我睇車路士對利物浦,在下半場尾段,車路士落後1比2,教練干地準備換入包括法比加斯等三個球員,當然利物浦得角球,三位球員在場外等候,直至界外球時候才被換入,所以,昨日我問大家在角球時間可不可以換人,昨晚我問教練顧錦輝,他說球例上是可以,但戰略上教練是不會在角球時間換人,尤其是防守的球隊,我即時明白,同時聯想到美聯儲局原則上可以在美國總統大選前加息,但事實上唔會,相信是同一道理,昨晚打夜波,打同睇都很舒服,秋高氣爽,的確沒有錯。