一星期內有兩次8號風球，又見到澳門要出動到解放軍救災，令到香港人唔再對打風掉以輕心。30歲樓下嘅人係未見過打風原來可以死人，所以先有咁多打風去滑浪嘅節目，而家明白到打風水浸可以浸滿停車場，冇人夠膽再睇小大自然。
荃灣新盤開售，打風都收到超過2萬票，證明想買樓嘅人遠超過供應數量，
只要價錢稍為收斂，買家即刻空群而出。所謂樓價同市民購買力脫節，其實只要發展商願意唔賺盡，繼續提供二按，賣樓一定賣晒，樓價絕對係市民負擔水平。就係有發展商願意用收斂價賣樓，市場嘅潛在購買力完全顯露出嚟，發展商未來賣樓可以更有把握。
政府講嘅未來四五年供應量9萬幾伙，其實完全掌控在發展商手上，唔到政府話事。如果發展商夠絕，未來幾年供應可以一伙都冇。發展商雖然係要貨如輪轉，但又唔會平賣以求盡快去貨。樓市唔似股市，市場資訊唔係即時可以反映，購買力多少好多時要事後先知。
賣樓係藝術
賣樓又要賣得晒，又要賣得價錢高，直情係藝術。發展商提供二按係可以增強購買力，但如果俾發展商揀，佢哋寧願唔賺二按。自己借二按，即係層樓賣咗都未收齊錢。況且二按即係自己承擔咗斷供風險，銀主盤價錢低過市價，你追債仔差價通常都係唔成功，最後只係令佢破產。
發展商唔肯減價賣樓嘅代價，就係要同債仔一齊冒上樓價下跌風險。市場成日以為發展商提供二按係同市民對賭，其實唔係，提供二按嘅發展商，同業主係坐埋同一條船，正如你唔會話提供按揭嘅銀行係同業主對賭，冇銀行想見到業主斷供。
App下載
