地產博客 > 樓市散打王 返回
瀏覽人次:7508    回應:11
樓市散打王
終極辣招
 
方卓如
2018年3月6日 (信報)

《財政預算案》冇乜好講,反而預算案記者會值得講。司長話會睇睇發展商點賣樓,留意到有發展商只係推一兩間單位招標,呢種賣樓手法引起關注。司長咁講,小心最強辣招出籠。發展商有樓唔賣,唔係嫌錢腥,剛剛相反,就係想賺盡。唧牙膏式賣樓先可以盡吸購買力,讓買家無可選擇,沒有仔細思考空間,有買趁手。

人最大嘅困惑,出現於有選擇嘅時候。有選擇,你會期望再好嘅選擇,就會放棄眼前揀唔落手嘅垃圾。冇得揀,垃圾都要放入口,幾貴都要買。

樓價愈跌愈難上車

賣樓惜售,賣唔晒留為貨尾,先可以維持而家嘅市價。如果發展商一口氣要賣晒先收手,減價清倉,樓價點會唔向下。正如股票一樣,斬倉沽貨,價錢點會唔跌?

如果政府連發展商點賣樓都管埋,令佢哋喪失定價權,樓價就有下跌壓力。政府要管賣樓方法唔係冇可能,新加坡就係咁做。外國發展商起樓,限期內要賣,否則要罰。政府只要在賣地條款,甚至喺售賣樓花同意書列明,幾時要全部賣晒,否則要徵稅,呢項就係最終辣招。

新加坡用呢招遏抑樓價非常成功,樓價的確一沉不起。如果政府以樓價下跌為己任,出此辣招,保證樓價下跌,但係平民百姓一樣買唔到樓。點解?

因為升緊嘅樓有人追,跌緊嘅樓冇人敢買,樓價下跌,銀行更加做唔足價。向下嘅樓市,銀行唔敢借足,自動扣減按揭成數。樓價向下,借二按嘅更高危,隨時負資產。樓價向下唔會令市民更易置業,相反更加令人買唔到樓。前輩話望自己發達都唔好望樓價跌,今時今日更加適用,只係今時今日要發達更加難。

預算案唔會講辣招,唔係場合,但係記招講咗政府有諗計。以前辣招冇一招可以推低樓價,市民唔開心。慎防最後一招真係可以推低樓價,到時你更加唔開心。