「猫奴狗奴」要服侍主子，置业或租楼都要千挑万选，因为香港可以养宠物嘅住宅唔多。
不过，有地产代理用咗超过一年时间，查询全港超过1,031个屋苑及大厦嘅管理公司，发现原来有435个确认可以养宠物，占约四成。
港岛及新界比例较高
毛城城置业业务拓展总监陈展文同丝丝讲，上述调查确认可以养宠物嘅物业中，52个为港铁物业，有20个可以养「毛孩」，比例亦近四成。佢仲话，楼龄十年以下嘅屋苑，高达七成可以养宠物添，而港岛及新界区比例亦较高。
佢哋将以上名单收录喺全港首份《可养宠物屋苑及大厦名册2018》，放喺网站畀公众查阅。
该网页显示，唔少大型屋苑都可以养宠物，如港岛区包括小西湾蓝湾半岛及北角城市花园；九龙区方面，有红磡黄埔花园及九龙湾德福花园等。而新界区名单中，有沙田中心及马鞍山新港城1至3期。
不过，仍然有部分大型屋苑唔喺名单入面，例如鰂鱼涌太古城、沙田第一城及天水围嘉湖山庄等。
愈来愈多市民养「毛孩」，有代理业界人士承认，过往查询买卖放盘或租盘客户中，十个就有约一、两个系宠物主人，佢哋会先了解屋苑可否饲养小动物。
余丝韵
App下载
