「开荒南野际，守拙归园田。方宅十余亩，草屋八九间。」陶渊明《归园田居》嘅呢几句诗脍炙人口，不过用嚟形容今时今日香港就颇有讽刺意味，事关无壳蜗牛为求有瓦遮头，只要租金够平，唔理好丑，但求就手，结果咪搞到农庄改建嘅劏房遍地开花罗！
话说屯门有农庄将约六千平方尺农田劏成约廿间「民宿」农庄，呢啲劏房系就系够平，二百平方尺月租千五蚊有交易，一百五十平方尺连小花园嘅农夫屋，月租亦只不过二千二百蚊，之不过睇真啲，所谓「民宿」其实只系一间残破铁皮屋，装修、家具、冷气等应有尽冇，「冲凉房」得条水喉，连门都冇装，洗手间更加要同其他租客共用，都咪话唔凄凉。
环境差仲系其次，最弊系有法律同消防问题。法律界人士系咁讲嘅，喺农地搭建构筑物本身已经违反地契规定，以日租或月租形式出租更明显违法；万一喺违规农地上发生意外，住客即使买咗保险，分分钟都冇得赔o架。
不过你咪理，农庄「民宿」有价有市，每逢夜晚更加系灯火通明，俨然小社区，不知几热闹。本报记者现场直击，净系呢条村啫，其中两、三幅农地已被辟为劏房出租，可想而知有几渴市。始终都系嗰句，有头发冇人想做瘌痢，住得呢类劏房嘅好多都系攞综援、轮候紧公屋嘅基层人士，唔跪地饩猪乸，唔通走去瞓天桥底咩！
呢嗱嗱嗱，呢个正正就系问题症结所在。劏房问题积重难返，点解当局长期视而不见？港产官僚做嘢求求其其，得过且过，固然系主要原因，特别系地政总署同寮管处，啱啱至畀审计报告狂炳，针对违规建筑物执法甩漏多多，令违规情况愈演愈烈。但当局讲唔出口嘅系，家阵公屋等上楼条龙仲长过万里长城，拉人封铺咯喎，点样安置住户先？咪惟有只眼开只眼闭罗。总而言之，最紧要冇死人冧楼，官老爷唔使孭镬，至於蚁民住猪栏定鸡棚，咁就你死你贱，贵客自理嘞。
唔系老屈o架，运输及房屋局局长张炳良就曾经讲过，取缔所有劏房不切实际，只要劏房冇违法就可以继续存在。香港作为全球数一数二最富裕城市，一方面唔少人住得仲差过第三世界嘅贫民，另一方面好似劏房波咁嘅业主赚到盆满钵满唔在讲，仲步步高升，做完局长做司长，不知几过瘾。人比人比死人，唔恨得咁多嘅喇。
讲嚟讲去，一日最衰都系港府拓土不力。人总系要有地方住，房屋问题死结一日唔解，呢类违法兼危机四伏嘅农庄劏房只会愈嚟愈多嘅咋。
App下载
