港独歪风泛滥成灾，有人口口声声「香港不是中国」，又叫嚣香港人要「民族自决」。系人都知，「香港民族」呢啲口号纯属无稽之谈，不过香港会唔会诞生一个「长颈族」咯喎，就真系冇人话得埋嘞。
唔系讲笑o架。根据生物学嘅「用进废退」理论，生物经常使用嘅器官会逐渐发达，长颈鹿为咗觅食，条颈向高空发展，就系典型例子。正如香港人一样，乜都要等一大餐，你话条颈有乜法子唔愈来愈长吖。根据房委会最新数字，截至九月底公屋轮候册累积申请近廿九万宗，平均轮候时间延长至四点五年，再创历史新高，亦同平均三年上楼嘅承诺距离愈来愈远，问你怕未。
话时话，每次公布公屋轮候平均时间，例牌都系历史新高，上次系四点一年，再再上次就系三点九年，增幅愈来愈大，都咪话唔得人惊。唔好忘记，申诉专员公署曾踢爆当局笃数，连长者优先及凶宅配屋都计埋入去，力求「缩短」平均轮候时间，可见所谓轮候四年半都系粉饰太平嘅啫，如果唔系，被迫栖身劏房嘅人口就唔会年年增加喇。
对於公屋轮候时间再创新高，连房委会都打定输数，预料未来几年将进一步抛离三年上楼目标，依家唯一可以做嘅，系进一步收紧富户政策，以加快公屋单位流转咁话。
讲真，腾出公屋畀有需要人士，冇人会反对。大家不妨去嗰啲富贵屋邨行番转，名车泊到通街系，仲有嗰啲薪高粮准嘅立法会议员，居然霸住公屋单位唔走，就知道公屋被滥用嘅问题几咁严重。问题系当局话要收紧富户政策，已经讲咗N次，以往一直做唔到，现届政府弱过药材铺，更加咪使旨意喇。
再讲吖，所谓「富户」都有好多种，上述揸名车又或者尊贵议员一类「超级富户」，到底有几多呢？如果交还单位少，止到痕止唔到咳；交还单位多呢，呢班「富户」有冇能力置业，又系另一个问题。政府最新数据显示，九月份整体私人住宅楼价创三年几以来最大单月涨幅，价格逼近旧年高峰。有人甚至认为，差估署数据时间上有滞后，实际上家阵已经超越楼市「癫峰」，可以想像，如果一大批「富户」加入搵楼大军，私楼供不应求嘅情况只会进一步加剧。
真系愈讲愈火滚，今届政府口号多多，又话用「洪荒之力」增加供应，又话房屋问题系施政「重中之重」，依家「重中之重」冇份，市民「惨上加惨」就有之！如果千百年后，人类学家真系喺香港发现「长颈族」遗迹，都系今届政府好带挈嘅咋！
App下载
