今个礼拜将会有两幅住宅地皮截标，包括今日截标嘅港铁（00066）将军澳日出康城第十期，同埋礼拜五截标嘅赤柱黄麻角道豪宅地，其中日出康城第十期由於地价比之前大降近20%，相信入标反应唔错，至於赤柱地皮系罕有港岛区优质豪宅地，早前虽然有测量师大幅调低估值两成，但预计每方尺楼面地价最高可以做到2.4万元，有机会成为今个年度尺价地王，地皮估值最高约54.3亿元。
将军澳日出康城第十期喺今日截标，项目早排收到24份意向书，系日出康城历来接获最多意向书嘅纯住宅项目。
康城十期反应料佳
刘Sir知道，康城十期补地价约16.59亿元，每方尺楼面补价约2,044元，比旧年底批出嘅第九期仲低19.7%，分红比例固定20%，发展商要额外出价竞投。
该项目提供介乎751至1,170个住宅单位。市场人士相信今日入标反应佳。
另外，黄麻角道豪宅地，占地约27.2万方尺，总楼面就大约22.6万方尺，预计可以提供大约180个单位，地盘位置邻近富豪海湾，由於港岛优质豪宅用地一向都好短缺，嚟紧星期五截标嘅黄麻角道地皮势必成为本年度尺价最高地王。
刘Sir老友高力国际张翘楚早排就因应市况回落，调减咗呢幅地皮约莫两成估值，预计每方尺楼面地价大概2.4万元，估值大约54.3亿元，佢话会维持呢个估值。
如果呢幅地皮真系以呢口尺价批出，就会成为今个财政年度方尺楼面地价最高地王，并且系一四年五月以来尺价最高嘅政府住宅地，当时南区寿臣山道西与黄竹坑径交界豪宅地嘅每方尺楼面地价就达约30,888元。
赤柱地有山坡因素
不过，最近部分土地出现流标情况，部分同地盘贴邻嘅山坡保养问题有关，而今次呢幅黄麻角道地皮亦面对同类问题，有测量师老友对地皮嘅估值较为保守。
理想城市张圣典话，中标财团要负责就邻近地盘嘅山坡进行岩土勘察同防护措施，而山坡面积正正同地皮嘅面积相若，或会影响发展商出价，佢估计每方尺楼面地价大约1.7万元。计番地皮估值约莫38.4亿元，系市场估值嘅下限价。
刘Sir
App下载
