今个礼拜将会有两个元朗项目截标，其中西铁元朗站项目会率先喺星期三打头阵。刘Sir知道，项目采用较简单嘅一口价招标模式，对部分发展商嚟讲更加系必争之地，相信附近有唔少项目嘅新地（00016）出价会几进取，投到地皮嘅话，可以连贯YOHO项目第1至3期，市场估计项目成交价最高约莫74.27亿元。而紧接星期五截标嘅同区牛潭尾新潭路住宅地，项目规模唔算好大，估值最多约4.07亿元。
刘Sir知道，呢个西铁元朗站上盖发展项目，喺上个月截收发展意向时收到23份意向书，今次会继续沿用价高者得一口价招标模式，而项目总楼面约莫148.5万方尺，提供不少於1,876伙。
刘Sir仲八到，今次项目设有1.7亿元前期工程费，而分红比例就固定为5%，仲加设咗建筑费封顶价，计算分红时可以扣除建筑费上限为64亿元，即系每方尺大约4,309元。
可连贯YOHO发展
老友理想城市张圣典就同刘Sir讲，呢个项目系全元朗区最具代表性嘅发展，而新界西北系将来重要发展地区，其中以元朗近年嘅发展速度最理想，而且呢个元朗站项目具有策略性，若果由新地成功投得，就可以连贯旗下嘅YOHO第1至3期发展项目。
佢仲预期，区内有项目嘅发展商出价或会比较进取，估计每方尺楼面地价可以去到约莫4,500元。折合估值约66.84亿元，至於市场估值就介乎约44.56亿去到74.27亿元。
至於紧接喺今个礼拜五截标嘅元朗牛潭尾新潭路与碧豪苑第一街交界地皮，地盘面积就大约9.4万方尺，提供约莫4.5万方尺总楼面。刘Sir知道呢幅地皮附近有唔少洋房项目，好似碧豪苑、加州花园及加州豪园等。
牛潭尾地料值4亿
刘Sir老友高纬环球张翘楚话，呢个牛潭尾项目规模唔算大，作为洋房发展都有一定可塑性，佢估计地皮嘅每方尺楼面地价约莫7,000元。计返估值就约莫3.17亿元，综合市场测量师意见，呢幅牛潭尾地皮估值介乎约2.71亿至4.07亿元。
刘Sir
App下载
