政府呢几年持续按季主动推地，所以每季库房都有稳定嘅卖地收益。刘Sir知道，今季政府一共批咗8幅住宅、商业同埋工业地皮，总成交额加埋约莫144.394亿元，按季大幅反弹咗约53%，仲系近11个季度以来，第十次季度卖地收益稳袋超过百亿元。睇番一四至一五整个财政年度就始终缺乏大型地皮批出，所以本年度约488亿元卖地收益，比起上个年度明显减少约83亿元，系近四个年度嘅低位。
刘Sir参考番地政总署资料，今季政府共批出8幅住宅、商业及工业用地，相比旧年第四季多咗两幅。
缺大地皮 靠高价撑起
而今季政府共批出8幅地皮，牵涉地价更加比起上季录得嘅约94.339亿元，大幅增加咗约53.1%去到约144.394亿元，系过去11个季度以来，第十次单季卖地收益超过百亿元，足证政府按季推地下，库房保持到稳定嘅收益。
而今季卖地收益出现回升，除咗批出嘅地皮数目多咗外，期内有多幅地皮以高价批出都系主要原因。
好似录得最高成交地价嘅观塘鸿业街、伟业街、顺业街与海滨道交界商业地，由领汇（00823）伙拍南丰以58.6亿元投得，成为政府卖地有纪录以来地价最高嘅商业地，呢幅地皮仲成为今个年度地价最高嘅单一地皮。
至於今年二月以23.898亿元批出嘅九龙笔架山龙翔道豪宅地，每方尺楼面地价高达20,534元，破尽九龙区卖地纪录嘅尺价新高。
财年埋单 少收逾83亿
不过，刘Sir发现，虽然地价系有上升趋势，但系今个财政年度批出嘅地皮整体嚟讲都系规模偏细，屈指一数有多达9幅地皮成交价唔够5亿元，以旧年四月批出嘅沙田大围美田路住宅地涉额最细，成交价约莫1.48亿元。
故此，拖累今个年度全年嘅地价收入减少，相比上个年度少咗83.38亿元，计番跌幅大约14.6%，成为政府主动按季卖地以来，近四个年度卖地收入嘅低位。
刘Sir
App下载
