西区一向以单幢楼同旧楼为主，所以买家多数系街坊，一幢楼往往一年只得3、4宗成交，不过自从港铁西港岛线通车后，区内部分物业最近成交量，拍得住去年全年水平。刘Sir睇番啲登记，好似第三街观海阁同坚尼地城嘅龙晖花园，今年以嚟录到3宗买卖登记，比旧年全年只少1宗，而呢类街坊盘楼价升幅都唔错，其中高街翠华阁有高层单位以近400万元卖出，同类单位唔够一年，个价升咗逾两成。
观海阁旧年录得4宗买卖登记，售价介乎约280万至310万元，而今年暂时录到3宗，每宗做价去到近300万元至近350万元。
观海阁实尺万八新高
好似观海阁高层A室，实用面积约187方尺，以348万元卖出，实用尺价18,610元，尺价除咗系呢个物业新高之外，相比起西区名厦宝翠园依家平均实用尺价近2万元，都唔算失礼。
至於邻近港铁站嘅龙晖花园，今年到依家都录到3宗买卖登记，同旧年全年比较，都只系差1宗，最近单位成交价更加逼近500万元，好似有个1座中层C室，实用面积约307方尺，以496万元卖出，实用尺价达16,156元，创咗屋苑新指标。
呢类知名度唔高嘅街坊盘，由於无咩外区客，所以过往楼价升幅未必追到大市，但依家就唔同咁讲，部分单位比一年前升咗超过两成。好似西营盘翠华阁，今年有个高层A室以399万元卖出，相比一年前有个再高层啲嘅A室，成交价328万元，升幅约22%，表现跑赢唔少大型屋苑，若果以单位实用面积约225方尺计，实用尺价去到17,733元。
宝翠园心雄索4千万
而位於第三街嘅丰逸大厦，今年已经录到两宗买卖登记，系旧年全年水平，有个中层A室今年卖咗440万元，相比唔够一年前的同类单位成交价系362万元，都升咗约22%。
反而同区豪宅宝翠园，呢两个月交投唔系特别旺，事关港铁通车之后，啲业主更加睇好呢个盘嘅升值潜力，除非个价好理想，否则未必会心动出货，依家有部分单位实尺叫价超过2.7万元。
好似该物业单边嘅第1座，有个中层E室，实用面积1,447方尺，望开扬景，开价要4,000万元，计落实用尺价约27,643元。
刘Sir
App下载
